मुंबई । रेशनकार्डधारकांसाठी महत्त्वाची बातमी समोर आली आहे. नवीन रेशनकार्ड काढायचे असेल किंवा बंद झालेले रेशनधान्य पुन्हा सुरू करायचे असेल, तर आता तहसीलदारांकडून मिळणारा उत्पन्नाचा दाखला सादर करणे बंधनकारक करण्यात आले आहे. विशेषतः कुटुंबातील सदस्यांचे रेशनकार्ड विभक्त केल्यानंतर धान्य बंद झालेल्या लाभार्थ्यांना या नियमाची पूर्तता करावी लागणार आहे.
अनेक कुटुंबांमध्ये लग्न झाल्यानंतर किंवा पत्ता बदलल्यानंतर रेशनकार्ड विभक्त केले जाते. मात्र, रेशनकार्ड विभक्त झाल्यानंतर जुन्या कार्डावरील धान्यपुरवठा बंद होतो. नवीन रेशनकार्ड मिळाल्यानंतरही अनेक लाभार्थ्यांना धान्य सुरू करून घेण्यासाठी अडचणींचा सामना करावा लागत आहे. आता अशा लाभार्थ्यांना उत्पन्नाचा दाखला जोडणे आवश्यक असणार आहे.
ग्रामीण आणि शहरी भागासाठी उत्पन्नाची वेगवेगळी मर्यादा
नवीन रेशनकार्ड देताना संबंधित कुटुंबाचे वार्षिक उत्पन्न तपासले जाणार आहे. यासाठी ग्रामीण आणि शहरी भागासाठी स्वतंत्र उत्पन्न मर्यादा निश्चित करण्यात आली आहे.
– ग्रामीण भाग : वार्षिक उत्पन्न ४४ हजार रुपयांपर्यंत.
– शहरी भाग : वार्षिक उत्पन्न ५९ हजार रुपयांच्या आत.
– अंत्योदय रेशनकार्ड : वार्षिक उत्पन्न १५ हजार रुपयांपेक्षा कमी असणे आवश्यक.
या उत्पन्नाच्या आधारे संबंधित कुटुंबाला अंत्योदय की प्राधान्यक्रम कुटुंब या श्रेणीतील रेशनकार्ड द्यायचे, हे निश्चित केले जाणार आहे. त्यामुळे नवीन रेशनकार्डसाठी अर्ज करताना तहसीलदारांचा उत्पन्नाचा दाखला जोडणे आवश्यक आहे.
हजारो लाभार्थ्यांचे रेशनधान्य बंद
केंद्र सरकारच्या ‘मिशन सुधार’ अंतर्गत करण्यात आलेल्या तपासणीत शहरातील ५३ हजार आणि ग्रामीण भागातील ४४ हजार लाभार्थ्यांचे रेशनधान्य बंद करण्यात आले आहे. यामध्ये ३५ हजार लाभार्थ्यांनी सलग तीन ते सहा महिने धान्याची उचल न केल्याने त्यांचे रेशनधान्य बंद झाले आहे. याशिवाय निर्धारित उत्पन्न मर्यादेपेक्षा अधिक उत्पन्न असलेल्या लाभार्थ्यांचीही तपासणी केली जात आहे.
नवीन रेशनकार्ड ३० दिवसांत मिळणार
नवीन रेशनकार्ड काढणे किंवा कुटुंबातील सदस्यांचे रेशनकार्ड विभक्त करण्याची प्रक्रिया आता ऑनलाइन करण्यात आली आहे. यासाठी लाभार्थ्यांना महा-ई-सेवा केंद्रात जाऊन अर्ज करावा लागणार आहे. आवश्यक कागदपत्रे ऑनलाइन अपलोड केल्यानंतर साधारण ३० दिवसांत नवीन रेशनकार्ड मिळू शकते.
अर्जासाठी आवश्यक कागदपत्रे :
1. कुटुंबातील सर्व सदस्यांचे आधारकार्ड.
2. रहिवासी पुरावा.
3. तहसीलदारांचा उत्पन्नाचा दाखला.
4. रेशनकार्ड विभक्त करायचे असल्यास जुने रेशनकार्ड.
त्यामुळे नवीन रेशनकार्ड काढू इच्छिणाऱ्या तसेच बंद झालेले रेशनधान्य पुन्हा सुरू करण्याच्या प्रतीक्षेत असलेल्या लाभार्थ्यांनी आवश्यक कागदपत्रांची पूर्तता करून अर्ज करावा. अन्यथा रेशनधान्य सुरू होण्याच्या प्रक्रियेत अडचणी येऊ शकतात.















Discussion about this post