नवी दिल्ली । पंतप्रधान नरेंद्र मोदी आणि केंद्र सरकारवर काँग्रेस नेते तथा लोकसभेतील विरोधी पक्षनेते राहुल गांधी यांनी पुन्हा एकदा गंभीर आरोप केले आहेत. आपला फोन टॅप केला जात असल्याचा खळबळजनक दावा राहुल गांधी यांनी केला असून, यासंदर्भात आपल्याकडे पुरावे असल्याचेही त्यांनी म्हटले आहे. सोशल मीडियावर व्हिडीओ पोस्ट करत त्यांनी हा आरोप केला. त्यामुळे देशाच्या राजकीय वर्तुळात नव्या वादाला तोंड फुटले आहे.
राहुल गांधी यांनी केलेल्या दाव्यानुसार, परकीय शक्तींच्या सांगण्यावरून कोण काम करत आहे, देशविरोधी कारवायांमध्ये कोण सहभागी आहे आणि हे प्रकार किती काळापासून सुरू आहेत, याबाबतची माहिती आपल्याकडे असल्याचे त्यांनी म्हटले. या संदर्भातील माहिती आपल्या फोनमध्ये असल्याचा दावाही त्यांनी केला आहे. मात्र, फोन टॅपिंगच्या आरोपांना अद्याप स्वतंत्र अधिकृत पुष्टी मिळालेली नाही. तसेच राहुल गांधी यांच्या आरोपांवर भाजपकडून अधिकृत प्रतिक्रिया समोर आलेली नाही.
दरम्यान, राहुल गांधी यांनी शुक्रवारी पुन्हा एकदा पंतप्रधान नरेंद्र मोदी यांना जाहीरपणे समोरासमोर चर्चेचे आव्हान दिले. दोघांमध्ये थेट चर्चा झाली, तर मोदी पंतप्रधानपदी राहणार नाहीत, असा दावाही त्यांनी केला. राहुल गांधी यांच्या या विधानामुळे राजकीय वातावरण अधिक तापण्याची शक्यता आहे.
‘लोकसभेत बोलू दिले जात नाही’
इन्स्टाग्रामवरील ‘आस्क मी’ या प्रश्नोत्तर सत्रात राहुल गांधी यांनी विविध मुद्द्यांवर आपली भूमिका मांडली. भाजप संसदेत चर्चेसाठी तयार असल्याचे सांगत असताना आपण सार्वजनिक चर्चेचा आग्रह का धरत आहोत, असा प्रश्न त्यांना विचारण्यात आला. यावर उत्तर देताना राहुल गांधी यांनी लोकसभेत आपल्याला अनेक महत्त्वाच्या विषयांवर बोलण्याची संधी दिली जात नसल्याचा आरोप केला. अनेकदा आपला मायक्रोफोन बंद करण्यात आल्याचेही त्यांनी सांगितले.
कृषी कायदे, मतचोरी, एसआयआर, चीनचा मुद्दा, जनरल नरवणे यांचे पुस्तक आणि एपस्टाईन प्रकरण अशा विषयांवर संसदेत बोलण्याची परवानगी मिळत नसल्याचा दावा त्यांनी केला. भाजपला दीर्घ भाषणांऐवजी या महत्त्वाच्या मुद्द्यांवर सविस्तर चर्चा करायची नसल्याचा आरोपही राहुल गांधी यांनी केला.
Discussion about this post