जळगाव । सोनं-चांदी खरेदी करण्याचा विचार करणाऱ्या ग्राहकांसाठी दिलासादायक बातमी आहे. गेल्या काही दिवसांपासून सोन्या-चांदीच्या दरात सुरू असलेल्या चढ-उतारांदरम्यान आज, १३ नोव्हेंबर रोजी जळगावच्या सराफा बाजारात दोन्ही मौल्यवान धातूंच्या दरात मोठी घसरण झाली आहे. बाजार सुरू होताच सोन्याच्या दरात तब्बल २ हजार ५०० रुपयांची, तर चांदीच्या दरात ४ हजार रुपयांची घट झाली आहे. त्यामुळे लग्नसराई तसेच आगामी सणांसाठी दागिने खरेदी करणाऱ्या ग्राहकांना काहीसा दिलासा मिळाला आहे.
सोन्याच्या दरात मोठी घसरण
जळगावच्या सराफा बाजारात आज २४ कॅरेट सोन्याचा दर प्रति १० ग्रॅम १ लाख ३६ हजार रुपये इतका झाला आहे. तर २२ कॅरेट सोन्याचा दर १ लाख २५ हजार रुपये प्रति १० ग्रॅम आहे. गेल्या काही दिवसांच्या तुलनेत सोन्याच्या दरात झालेली ही घसरण ग्राहकांसाठी महत्त्वाची ठरत आहे.
चांदीही ४ हजारांनी स्वस्त
सोन्याबरोबरच चांदीच्या दरातही मोठी घट झाली आहे. जळगावमध्ये आज चांदीचा दर १ लाख ८१ हजार रुपये प्रति किलो इतका झाला आहे. गुरुवारी चांदीचा दर १ लाख ८५ हजार रुपये होता. त्यामुळे अवघ्या एका दिवसात चांदीच्या दरात ४ हजार रुपयांची घसरण झाली आहे.
काही दिवसांत दरात मोठी उलथापालथ
गेल्या काही दिवसांतील सोन्या-चांदीच्या दरांवर नजर टाकली असता बाजारात सातत्याने चढ-उतार सुरू असल्याचे दिसून येते. ८ नोव्हेंबर रोजी सोन्याचा दर सुमारे १ लाख ४२ हजार रुपये होता. त्यानंतर दरात वाढ-घट होत आज सोन्याचा भाव १ लाख ३६ हजार ५०० रुपयांपर्यंत खाली आला आहे. त्यामुळे सोनं-चांदी खरेदी करणाऱ्या ग्राहकांचे आता बाजारातील पुढील दरांकडे लक्ष लागले आहे.
दरम्यान, दागिने खरेदी करताना सोन्या-चांदीच्या मूळ दरासोबत जीएसटी, घडणावळ आणि इतर शुल्क आकारले जात असल्याने अंतिम बिलाची रक्कम बदलू शकते. त्यामुळे खरेदी करण्यापूर्वी स्थानिक सराफाकडून ताजे दर आणि अंतिम किंमत निश्चित करून घेणे आवश्यक आहे.
Discussion about this post