मुलाचा उमेदवारी अर्ज बाद होताच किशोर पाटील आक्रमक; म्हणाले, ‘हिशोब चुकता करणार’

जळगाव : जिल्हा बँकेच्या निवडणुकीत मुलगा सुमित पाटील यांचा उमेदवारी अर्ज बेकायदेशीरपणे बाद ठरवण्यात आल्याचा गंभीर आरोप शिवसेना आमदार किशोर पाटील यांनी केला आहे. या संपूर्ण प्रकरणामागे ‘अदृश्य शक्ती’चा हात असल्याचा दावा करत योग्य वेळ आल्यावर संबंधितांचे नाव जाहीर करून हिशोब चुकता करण्याचा इशाराही त्यांनी दिला. मुलाला न्याय मिळवून देण्यासाठी सहनिबंधकांपासून ते उच्च न्यायालय आणि सर्वोच्च न्यायालयापर्यंत लढा देण्याची तयारी असल्याचे त्यांनी स्पष्ट केले. सोमवारी (दि. ९) आयोजित पत्रकार परिषदेत ते बोलत होते.

आमदार किशोर पाटील यांनी निवडणूक निर्णय अधिकारी आणि जिल्हा उपनिबंधकांच्या (डीडीआर) कार्यपद्धतीवर प्रश्नचिन्ह उपस्थित केले. सुमित पाटील यांच्या उमेदवारी अर्जात कोणतीही तांत्रिक त्रुटी नव्हती. सर्व आवश्यक कागदपत्रांची पडताळणी करूनच अर्ज दाखल करण्यात आला होता. असे असताना अर्ज कोणत्या कायदेशीर तरतुदीखाली बाद करण्यात आला, असा सवाल त्यांनी उपस्थित केला. डीडीआर यांनी लेखापरीक्षकाला पत्र देण्याचा अधिकार कोणत्या नियमांतर्गत वापरला, याचेही उत्तर मिळणे आवश्यक असल्याचे ते म्हणाले.

या प्रकरणाची सुनावणी सध्या सहनिबंधकांकडे सुरू असून १७ नोव्हेंबरपर्यंत संयम बाळगणार असल्याचे त्यांनी सांगितले. मात्र, या प्रकरणामागील अदृश्य शक्ती कोण आहे, हे योग्य वेळी उघड करणार असल्याचा इशाराही त्यांनी दिला.

१० मते मिळवून दाखवा, सुमितचा राजीनामा देतो!

विरोधकांना थेट आव्हान देताना किशोर पाटील म्हणाले की, प्रत्यक्ष निवडणुकीत पराभूत करणे शक्य नसल्यानेच उमेदवारी अर्ज बाद करण्याची खेळी करण्यात आली आहे. एकूण ७९ पैकी ७५ मतदार दिवाळी फराळाला उपस्थित होते. विरोधकांनी प्रत्यक्ष निवडणूक लढवून १० पेक्षा अधिक मते मिळवून दाखवावीत, असे आव्हान त्यांनी दिले. तसे झाल्यास सुमितचा तात्काळ राजीनामा मिळवून देईन, असेही त्यांनी स्पष्ट केले.

शिवसेनेला युतीत समान वाटा हवा!

जिल्हा बँकेच्या निवडणुकीतील महायुतीच्या समीकरणावरही आमदार पाटील यांनी भूमिका स्पष्ट केली. भाजप आणि शिवसेनेला समान जागा मिळाव्यात, तर उर्वरित जागा राष्ट्रवादी काँग्रेसला देण्यात याव्यात, अशी भूमिका त्यांनी मांडली. चेअरमन पदाबाबत योग्य तोडगा काढावा, तसेच व्हाईस चेअरमन पद तिन्ही पक्षांना प्रत्येकी एक वर्षासाठी देण्यात यावे, अशी मागणीही त्यांनी केली.

गिरीश महाजन आणि गुलाबराव पाटील यांनी युतीचे संकेत दिले असून १७ नोव्हेंबरनंतर जागावाटपाचे चित्र स्पष्ट होईल, असा विश्वास त्यांनी व्यक्त केला. जिल्हा बँकेच्या निवडणुकीत शिवसेनेला सन्मानजनक वाटा मिळालाच पाहिजे, असा आग्रहही त्यांनी धरला.

एकूणच, सुमित पाटील यांच्या उमेदवारी अर्जावरून सुरू झालेला वाद आता न्यायालयीन लढाई आणि महायुतीच्या जागावाटपापर्यंत पोहोचला असून, जिल्हा बँकेच्या निवडणुकीतील राजकीय घडामोडींना वेग आला आहे.