जळगाव : जळगाव जिल्हा कारागृहात बंदीवानांमधील वादातून मारहाणीची धक्कादायक घटना समोर आली आहे. जेवणाच्या वेळी भाजी मागितल्याच्या क्षुल्लक कारणावरून एका बंदीवानाला चौघांनी मिळून बेदम मारहाण केली. कारागृहातील वर्ग क्रमांक दोनमध्ये ही घटना घडली. या मारहाणीत संबंधित बंदीवानाचा दात पडला असून ओठाला सूज आणि शरीरावर मुक्कामाराच्या जखमा झाल्या आहेत.
आकाश गोरखा असे मारहाण झालेल्या बंदीवानाचे नाव आहे. जेवणाच्या वेळी आकाशने हर्षल गुरव याच्याकडे भाजी मागितली होती. याच गोष्टीचा राग मनात धरून हर्षलने आकाशच्या कानशिलात लगावली. त्यानंतर बिरसिंग ऊर्फ विक्की तोमर, सागर कोळी आणि धनंजय कोळी या तिघांनीही हर्षलसोबत मिळून आकाशला मारहाण केली.
या मारहाणीत आकाशच्या ओठाला सूज आली, त्याचा एक दात पडला, तसेच शरीरावर मुक्कामाराच्या जखमा झाल्याची तक्रार करण्यात आली आहे. या घटनेप्रकरणी हर्षल गुरव, बिरसिंग ऊर्फ विक्की तोमर, सागर कोळी आणि धनंजय कोळी या चौघांविरुद्ध जिल्हापेठ पोलीस ठाण्यात गुन्हा दाखल करण्यात आला आहे.
पोलीस उपनिरीक्षक गोपाळ देशमुख या प्रकरणाचा पुढील तपास करीत आहेत. दरम्यान, कारागृहासारख्या सुरक्षित ठिकाणीच बंदीवानाला मारहाण झाल्याने कारागृहातील सुरक्षा व्यवस्था आणि बंदीवानांच्या देखरेखीबाबत प्रश्न उपस्थित होत आहेत.
Discussion about this post