मुंबई । येत्या १२ मे रोजी होणाऱ्या विधानपरिषदेच्या १० जागांच्या निवडणुकीसाठी महाराष्ट्रातील राजकीय वातावरण तापू लागले आहे. विशेषतः मुख्यमंत्री एकनाथ शिंदे यांच्या नेतृत्वाखालील शिवसेनेने (शिंदे गट) या निवडणुकीसाठी कंबर कसली असून, उमेदवारी निवडीत पुन्हा एकदा धक्कातंत्र वापरले जाण्याची दाट शक्यता वर्तवली जात आहे.
विधानसभेत शिंदे गटाचे संख्याबळ ५७ असल्याने पक्षाच्या दोन जागा सहज निवडून येऊ शकतात. यामध्ये विधान परिषदेच्या उपसभापती नीलम गोऱ्हे यांचा कार्यकाळ संपत असून, त्यांच्या अनुभवाचा विचार करता त्यांना पुन्हा संधी मिळण्याची दाट शक्यता आहे. मात्र, दुसऱ्या जागेसाठी पक्षात मोठी चढाओढ सुरू आहे.
दुसऱ्या जागेसाठी खालील नावांची जोरदार चर्चा आहे:
रविंद्र फाटक
संजय मोरे
किरण पावसकर
शीतल म्हात्रे
शायना एनसी
दीपक सावंत
असे असले तरी, राज्यसभेप्रमाणेच यावेळीही एखादे अनपेक्षित किंवा विनाचर्चेतील नाव समोर आणून एकनाथ शिंदे सर्वांना चकित करू शकतात, अशी चर्चा राजकीय वर्तुळात रंगली आहे.
अकार्यक्षम मंत्र्यांची खुर्ची धोक्यात?
केवळ उमेदवारीच नाही, तर मंत्रिमंडळातही मोठ्या फेरबदलाचे संकेत मिळत आहेत. सध्याच्या काही मंत्र्यांच्या कामगिरीवर पक्षातील आमदारांमध्ये उघड नाराजी आहे. ‘लोकसंपर्क नसलेले आणि कामात अकार्यक्षम’ असलेल्या काही मंत्र्यांना हटवून आगामी विधानसभा निवडणुकांच्या पार्श्वभूमीवर नव्या दमाच्या नेत्यांना संधी दिली जाऊ शकते.
Discussion about this post