मुंबईत रंगला विधानपरिषद सदस्यांचा शपथविधी सोहळा; जळगावचे नंदकिशोर महाजनांसह १६ आमदारांनी घेतली शपथ

मुंबई : राज्य विधानपरिषदेत आज नवनिर्वाचित सदस्यांचा शपथविधी सोहळा पार पडला. स्थानिक स्वराज्य संस्था मतदारसंघ आणि इतर जागांवरील निवडणुकांमधून विजयी झालेल्या एकूण 16 सदस्यांनी आमदार म्हणून शपथ घेतली. यामध्ये जळगावचे नंदकिशोर महाजन यांचा देखील समावेश होता.

विशेष म्हणजे, नाशिक स्थानिक स्वराज्य संस्था मतदारसंघातून अपक्ष म्हणून विजयी झालेले गोकुळ गीते यांनी विजय मिळवल्यानंतर उपमुख्यमंत्री एकनाथ शिंदे यांची भेट घेत शिवसेनेचे सहयोगी सदस्यत्व स्वीकारले. त्यामुळे नाशिकमधील निकालानंतर निर्माण झालेल्या राजकीय चर्चांना नवे वळण मिळाले आहे.

स्थानिक स्वराज्य संस्था मतदारसंघाच्या निवडणुकीत महायुतीने 11 पैकी 10 जागांवर विजय मिळवत दणदणीत यश संपादन केले. मात्र, नाशिकमध्ये महायुतीचे उमेदवार नरेंद्र दराडे यांचा पराभव झाल्याने काही काळ राजकीय आरोप-प्रत्यारोप रंगले होते. आता गोकुळ गीते यांनी शिंदे गटाशी जवळीक वाढवल्याने महायुतीच्या ताकदीत आणखी भर पडल्याचे मानले जात आहे.

दरम्यान, विधानभवनात पार पडलेल्या शपथविधी सोहळ्यात खासदार सुप्रिया सुळे यांचे जावई अरुण लखानी यांनीही आमदार म्हणून शपथ घेतली. यावेळी रेवती सुळेही उपस्थित होत्या.

दोन महिन्यांत 27 सदस्यांची निवड

गेल्या दोन महिन्यांत विधानपरिषदेच्या दोन टप्प्यांतील निवडणुकांमधून एकूण 27 सदस्यांची निवड झाली आहे. यापैकी 10 जागांसाठी झालेल्या निवडणुकीत सर्व उमेदवार बिनविरोध निवडून आले होते. त्यामध्ये महायुतीचे 9 आणि ठाकरे गटाच्या शिवसेनेचा 1 सदस्य निवडून आला होता.

त्यानंतर स्थानिक स्वराज्य संस्था मतदारसंघातील 17 जागांसाठी निवडणूक झाली. यापैकी 6 सदस्य बिनविरोध निवडून आले, तर उर्वरित 11 जागांपैकी 10 जागांवर महायुतीने विजय मिळवला. एका जागेवर अपक्ष उमेदवार गोकुळ गीते विजयी झाले, मात्र त्यांनी नंतर शिंदे गटाचे सहयोगी सदस्यत्व स्वीकारले.

आज शपथ घेतलेले सदस्य

आज विधानपरिषदेत शपथ घेतलेल्या सदस्यांमध्ये विक्रम काकडे, अनिकेत तटकरे, धैर्यशील कदम, गोकुळ गीते, राजीव पोतदार, बसवराज पाटील, अरुण लखानी, अमर राजूरकर, अविनाश ब्राह्मणकर, दुष्यंत चतुर्वेदी, नंदकिशोर महाजन, प्रवीण पोटे, सुहास शिरसाठ, रवींद्र फाटक, राजेंद्र राऊत आणि प्राजक्त तनपुरे यांचा समावेश आहे.

महायुतीच्या विजयामुळे विधानपरिषदेत सत्ताधारी आघाडीची ताकद आणखी वाढली असून आगामी राजकीय घडामोडींवर या निकालाचा परिणाम होण्याची शक्यता व्यक्त केली जात आहे.