भुसावळ : वरणगाव (ता. भुसावळ) येथील एकाच कुटुंबातील तीन जणांचा भीषण अपघातात मृत्यू झाल्याची दुर्दैवी घटना घडली आहे. उज्जैनहून महाकालचे दर्शन घेऊन आनंदाने घरी परतत असताना हा अपघात बोरगाव बुजुर्ग पोलिस चौकी हद्दीतील नॅशनल हायवेवर घडला. या घटनेत आई, मुलगा आणि अवघ्या पाच वर्षांच्या चिमुकलीचा मृत्यू झाल्याने संपूर्ण परिसरात हळहळ व्यक्त होत आहे.
वरणगाव फॅक्टरी येथील श्याम विक्रम ठाकूर (४५) हे आपल्या कुटुंबासह अर्टिगा कारने उज्जैन येथे दर्शनासाठी गेले होते. गुरुवारी रात्री उशिरा ते उज्जैनहून घरी परतत असताना स्वतः श्याम ठाकूर कार चालवत होते. शुक्रवारी पहाटे बोरगाव बुजुर्गजवळ वाहन चालवत असताना त्यांना अचानक डुलकी लागल्याने कार अनियंत्रित झाली आणि रस्त्याच्या कडेला असलेल्या विजेच्या खांबावर प्रचंड वेगाने धडकली.
ही धडक इतकी भीषण होती की कारचा पुढील भाग पूर्णपणे चेपला गेला. अपघातानंतर परिसरात एकच खळबळ उडाली. स्थानिक नागरिकांनी आणि पोलिसांनी तातडीने मदतकार्य सुरू करत जखमींना रुग्णालयात दाखल केले.
या भीषण अपघातात श्याम विक्रम ठाकूर (४५), शोभा विक्रम ठाकूर (६०) आणि शिवन्या श्याम ठाकूर (५, रा. वरणगाव फॅक्टरी, ता. भुसावळ) यांचा मृत्यू झाला. तर या अपघातात पत्नी, दोन मुली आणि इतर नातेवाईकांसह एकूण ६ जण गंभीर जखमी झाले असून त्यांच्यावर रुग्णालयात उपचार सुरू आहेत.
दरम्यान, या हृदयद्रावक घटनेमुळे वरणगाव परिसरात शोककळा पसरली असून, नागरिकांकडून हळहळ व्यक्त केली जात आहे.
Discussion about this post