मुंबई । मुख्य निवडणूक आयुक्त ज्ञानेश कुमार यांच्याविरोधात विरोधकांचा आक्रमक पवित्रा पाहायला मिळत असून, शिवसेना (उद्धव बाळासाहेब ठाकरे) पक्षाचे पक्षप्रमुख उद्धव ठाकरे यांनी घेतलेल्या पत्रकार परिषदेत ज्ञानेश कुमार यांच्यावर गंभीर आरोप करत जोरदार हल्लाबोल केला आहे.
‘पक्ष फोडणाऱ्या टोळीचे मुख्य सूत्रधार ज्ञानेश कुमार हेच आहेत, त्यांचा तातडीने राजीनामा घेण्यात यावा आणि त्यांना तुरुंगात टाकण्यात यावे,’ अशी मागणी उद्धव ठाकरे यांनी केली आहे. तसेच लोकशाही वाचवण्यासाठी सर्व विरोधी पक्षांनी एकत्र येण्याचे आवाहन त्यांनी यावेळी केले.
ठाकरे यांनी आरोप केला की, निवडणूक आयोगाने यापूर्वी शिवसेनेच्या बाबतीत पक्षाचे नाव आणि चिन्ह दुसऱ्या गटाला दिले. राष्ट्रवादी काँग्रेसच्या बाबतीतही अशीच परिस्थिती निर्माण झाल्याचा दावा त्यांनी केला. या निर्णयांमुळे लोकशाही प्रक्रियेवर प्रश्नचिन्ह निर्माण होत असल्याचे ठाकरे म्हणाले.
दरम्यान, निवडणूक आयोगातील दोन निवडणूक आयुक्तांनी गेल्या दहा महिन्यांत SIR आणि मतदार यादीशी संबंधित निर्णयांवर अनेक वेळा आक्षेप नोंदवल्याचा एका वृत्तात दावा करण्यात आला आहे. या वृत्तानुसार, सुखबीर सिंह संधू आणि विवेक जोशी यांनी काही निर्णयांबाबत लेखी आक्षेप नोंदवले होते.
या पार्श्वभूमीवर उद्धव ठाकरे यांनी निवडणूक आयुक्त सुखबीर सिंह संधू आणि विवेक जोशी यांनी धाडस दाखवल्याचे सांगत त्यांचे अभिनंदन केले. “देशांतर्गत, पक्षांतर्गत लोकशाही कशी राबवली जाते की नाही हे बघणारा निवडणूक आयुक्त नेमणुकीद्वारे नेमला जातो. त्याची निवडणूक का होत नाही?. मग हा कोणाच्या मर्जीने नेमला जातो? कोण नेमतो याला? मर्जीने याची नेमणूक होत असेल तर त्यांच्या घरचं पाणी भरणार. तो पाणी भरताना इतकं पाणी भरतोय की त्यात देशाची लोकशाही बुडतेय” असं उद्धव ठाकरे म्हणाले.
आता तुमच्या लक्षाय येत असेल, म्हणून मी विचारलं, तुम्ही सगळे चॅनलवाले पत्रकार परिषदा दाखवता का? चॅनलने त्या भयातून बाहेर येणं गरजेचं आहे. आता जनता रस्त्यावर उतरली तर मात्र काही सांगता येत नाही. तुम्ही लोकशाहीचे आधारस्तंभ आहात. लोकशाहीचा होत असलेला हा खून, पक्ष फोडणारी दरोडेखोरांची टोळी याचा पर्दाफाश जनतेसमोर आला पाहिजे” असं उद्धव ठाकरे यांनी म्हटलं.
Discussion about this post