सर्वोच्च न्यायालयात पदवीधरांना सरकारी नोकरीची मोठी संधी; २५० जागांवर भरती

सरकारी नोकरीच्या शोधात असलेल्या तरुणांसाठी मोठी संधी उपलब्ध झाली आहे. भारतीय सर्वोच्च न्यायालयात ज्युनियर कोर्ट असिस्टंट पदाच्या तब्बल 250 जागांसाठी भरती प्रक्रिया जाहीर करण्यात आली आहे. या भरतीसाठी पात्र उमेदवारांना ऑनलाइन पद्धतीने अर्ज करता येणार असून, या भरतीसाठी अर्ज करण्याची प्रक्रिया 08 ऑक्टोबर 2026 पासून सुरु होणार आहे. आणि अर्ज करण्याची अंतिम मुदत 28 ऑक्टोबर 2026 रोजी रात्री 11.55 वाजेपर्यंत आहे.

250 पदांसाठी भरती

सर्वोच्च न्यायालयातील या भरतीअंतर्गत ज्युनियर कोर्ट असिस्टंट पदाच्या एकूण 250 जागा भरण्यात येणार आहेत. त्यामुळे पदवीधर उमेदवारांसाठी ही महत्त्वाची रोजगाराची संधी आहे.

शैक्षणिक पात्रता काय?

या पदासाठी अर्ज करणारा उमेदवार पदवीधर असणे आवश्यक आहे. यासोबतच संगणकावर इंग्रजी टायपिंगचा वेग किमान 35 शब्द प्रति मिनिट असणे आवश्यक आहे. उमेदवाराला संगणकाचे मूलभूत ज्ञानही असणे गरजेचे आहे.

वयोमर्यादा किती?

उमेदवाराचे वय 1 सप्टेंबर 2026 रोजी 18 ते 30 वर्षांदरम्यान असावे. अनुसूचित जाती आणि जमातीच्या उमेदवारांना वयोमर्यादेत 5 वर्षांची, तर इतर मागासवर्गीय म्हणजेच OBC उमेदवारांना 3 वर्षांची सवलत देण्यात येणार आहे.

अर्ज शुल्क किती?

या भरतीसाठी सर्वसाधारण प्रवर्गातील उमेदवारांना 1,500 रुपये अर्ज शुल्क भरावे लागणार आहे. तर SC, ST, OBC, PWD आणि माजी सैनिक उमेदवारांसाठी अर्ज शुल्क 750 रुपये आहे.

नोकरीचे ठिकाण दिल्ली

ज्युनियर कोर्ट असिस्टंट पदावर निवड झालेल्या उमेदवारांचे नोकरीचे ठिकाण दिल्ली असणार आहे. उमेदवारांची निवड प्रक्रिया आणि परीक्षेची तारीख याबाबतची सविस्तर माहिती नंतर जाहीर करण्यात येणार आहे.

28 ऑक्टोबरपर्यंत अर्जाची संधी

या भरतीसाठी इच्छुक आणि पात्र उमेदवारांना ऑनलाइन पद्धतीने अर्ज करावा लागणार आहे. अर्ज करण्याची अंतिम तारीख 28 ऑक्टोबर 2026 रोजी रात्री 11.55 वाजता आहे. त्यामुळे उमेदवारांनी शेवटच्या दिवसाची वाट न पाहता आवश्यक कागदपत्रांसह वेळेत अर्ज प्रक्रिया पूर्ण करण्याचे आवाहन करण्यात आले आहे.