मुक्ताईनगर : जिल्हा कौशल्य विकास, रोजगार व उद्योजकता मार्गदर्शन केंद्र, जळगाव आणि शासकीय कृषी महाविद्यालय, मुक्ताईनगर यांच्या संयुक्त विद्यमाने आयोजित पंडित दीनदयाळ उपाध्याय रोजगार मेळावा अर्थात ‘रोजगार महाकुंभ’ शासकीय कृषी महाविद्यालयात नुकताच पार पडला. या मेळाव्यात १५० हून अधिक युवक-युवतींनी सहभाग नोंदविला.
कौशल्य, रोजगार, उद्योजकता व नाविन्यता विभागाचे मंत्री मंगल प्रभात लोढा यांच्या संकल्पनेतून आयोजित रोजगार महाकुंभ महाराष्ट्र उपक्रमाचे उद्घाटन मुख्यमंत्री देवेंद्र फडणवीस यांच्या हस्ते ऑनलाइन पद्धतीने झाले. मुक्ताईनगर येथील कार्यक्रमाच्या अध्यक्षस्थानी महाविद्यालयाचे अधिष्ठाता डॉ. संदीप पाटील होते.
मेळाव्यात पार्थ इंटरप्राईजेस, युवा शक्ती फाउंडेशन, केस क्रॉप प्रा. लि. पुणे, द ग्रीन जेनेसिस इंडस्ट्रीज, ग्रो इंडिगो आणि नागार्जुन कन्स्ट्रक्शन लिमिटेड आदी कंपन्यांनी सहभाग घेत उमेदवारांच्या मुलाखती घेतल्या. पदव्युत्तर, पदवी, पदविका, आयटीआय, बारावी व दहावी उत्तीर्ण उमेदवारांना त्यांच्या शैक्षणिक पात्रता व कौशल्यानुसार विविध रोजगाराच्या संधींची माहिती देण्यात आली.
यावेळी अध्यक्षीय भाषणात अधिष्ठाता डॉ. संदीप पाटील यांनी युवकांनी केवळ शासकीय नोकरीवर अवलंबून न राहता खासगी क्षेत्र, स्वयंरोजगार, उद्योजकता आणि कौशल्याधारित रोजगाराच्या संधींचा विचार करावा, असे आवाहन केले. रोजगार मेळाव्यांमुळे युवकांच्या कौशल्याला योग्य व्यासपीठ मिळून रोजगारक्षमता वाढण्यास मदत होते, असे त्यांनी सांगितले.
कार्यक्रमास आयटीआय उचंदेचे प्राचार्य एस. एन. गुरचळ, आयटीआय जोंधळखेड्याचे प्राचार्य आशिष महाजन, प्रा. डॉ. जी. पी. देशमुख, सहाय्यक कुलसचिव सुशांत उके, आयटीआय समन्वयक एस. डी. धायतडक, पी. पी. इंगळे यांच्यासह विविध कंपन्यांचे प्रतिनिधी उपस्थित होते. केंद्रीय राज्यमंत्री रक्षा खडसे, आमदार चंद्रकांत पाटील, आमदार एकनाथराव खडसे व विधान परिषद सदस्य नंदूभाऊ महाजन यांनी मेळाव्यास शुभेच्छा दिल्या.
कार्यक्रमाचे सूत्रसंचालन प्रा. सागर पाटील यांनी केले. मालमत्ता अधिकारी डॉ. आर. एस. शेख यांनी आभार मानले. कार्यक्रमाच्या यशस्वी आयोजनासाठी महाविद्यालयातील प्राध्यापक, अधिकारी, शिक्षकेतर कर्मचारी आणि विद्यार्थी-विद्यार्थिनींनी परिश्रम घेतले.
Discussion about this post