पाळधी- तरसोद बायपासवर पुन्हा भीषण अपघात ; कंटेनरच्या धडकेत दुचाकीस्वार तरुणाचा मृत्यू

जळगाव । आजोबांच्या श्राद्धासंदर्भातील कामासाठी आणि बहिणीला आणण्यासाठी दुचाकीने जळगावकडे निघालेल्या एका ३० वर्षीय तरुणाचा कंटेनरच्या धडकेत भीषण अपघातात मृत्यू झाल्याची अत्यंत दुर्दैवी घटना घडली आहे. ललित मनोहर झंवर (वय ३०, रा. भवानी माता मंदिराजवळ, पिंप्राळा, जळगाव) असे मृत तरुणाचे नाव असून टहाकळी फाट्याजवळ बायपासवर हा अपघात झाला. विशेष म्हणजे, गेल्या दोन महिन्यांत याच महामार्गावर झालेला हा आठवा मृत्यू असल्याने तीव्र संताप आणि हळहळ व्यक्त होत आहे.

नेमकी घटना कशी घडली?

ललित झंवर हे एलआयसी आणि स्टार हेल्थ कंपनीत प्रतिनिधी म्हणून कार्यरत होते. त्यांचे आई-वडील पाळधी (ता. जळगाव) येथील मारवाडी गल्लीत राहतात.
सोमवारी आजोबांचे श्राद्ध असल्यामुळे त्याबाबत चर्चा करण्यासाठी ललित पाळधी येथे गेले होते. चर्चा झाल्यानंतर, जळगाव येथे सासर असलेल्या आपल्या बहिणीला घेण्यासाठी ते दुचाकीने (एमएच १९) बायपासमार्गे जळगावात परतत होते. यादरम्यान, बायपासवरील टहाकळी फाट्याजवळ आणि पाळधी रेल्वे पुलाजवळ समोरून येणाऱ्या एका कंटेनरने त्यांच्या दुचाकीला जोरदार धडक दिली.

कंटेनरच्या भीषण धडकेत ललित दुचाकीसह दूर फेकला गेले. या अपघातात त्यांचा चेहरा दबला गेला, दोन्ही हात व पाय फॅक्चर झाले असून शरीरावर गंभीर जखमा झाल्या. वैद्यकीय अधिकाऱ्यांनी (सीएमओ) अमोल पाटील यांनी त्यांचा मृत्यू झाल्याचे सांगितले. सूर्यास्त झाल्यानंतर मृत्यू झाल्याने नियमानुसार मृतदेहाचे शवविच्छेदन सोमवारी सकाळी करण्यात येणार आहे.

महामार्गावरील वाढत्या अपघातांचा प्रश्न ऐरणीवर
पिंप्राळा येथील तरुण आणि होतकरू युवकाचा असा अचानक अंत झाल्यामुळे झंवर कुटुंबावर आणि परिसरात शोककळा पसरली आहे. या बायपास मार्गावर अवजड वाहनांमुळे अपघातांचे प्रमाण वाढले असून, अवघ्या दोन महिन्यांत आठ बळी गेल्याने प्रशासनाने व वाहतूक पोलिसांनी यावर तातडीने उपाययोजना कराव्यात, अशी मागणी संतप्त नागरिकांमधून होत आहे.