जळगाव : भाजपचे नेते विजय चौधरी आणि राज्याचे मंत्री गिरीश महाजन यांच्यातील असल्याचा दावा करण्यात येणारी एक कथित ऑडिओ क्लिप सोशल मीडियावर व्हायरल झाल्यानंतर राज्याच्या राजकीय वर्तुळात मोठी खळबळ उडाली आहे. या कथित क्लिपमध्ये राष्ट्रवादी काँग्रेस (शरदचंद्र पवार) पक्षाचे आमदार एकनाथ खडसे आणि केंद्रीय राज्यमंत्री रक्षा खडसे यांच्याबाबत आक्षेपार्ह भाषा वापरण्यात आल्याचा दावा केला जात आहे.
व्हायरल होत असलेल्या कथित संभाषणामध्ये एकनाथ खडसे यांच्या राजकीय भूमिकेवर टीका करण्यात आल्याचा तसेच केंद्रीय राज्यमंत्री रक्षा खडसे यांच्या मंत्रिपदाबाबतही चर्चा झाल्याचा दावा आहे. सोशल मीडियावर ही कथित क्लिप मोठ्या प्रमाणावर व्हायरल होत असून, त्यावरून विविध राजकीय प्रतिक्रिया उमटत आहेत.
व्हायरल होत असलेल्या कथित क्लिपमध्ये भाजपचे नेते विजय चौधरी यांनी म्हटलं की, ‘एकनाथ खडसे आणि त्याची मुलगी हे नेहमी भाजपवर टीका करत असतात आणि आपण त्यांच्या सुनेला मंत्री करून ठेवला आहे. हीच मंत्रिपद काढून घेतला पाहिजे, हे कुठेतरी थांबला पाहिजे. एकाच घरात तीन तीन जणांना वेगवेगळ्या पक्षांचे पद दिले जात आहे. केंद्रीय मंत्री रक्षा खडसे यांना मंत्रिपद काढून घ्यावे. खडसे उठल्या सुटल्या घाणेरडे आरोप करतो शिवीगाळ करतो.’
‘हे काहीतरी करावं लागेल रक्षा खडसे या मंत्रिमंडळात आहे. ते एकाच घरात राहतात एकमेकांना मदत करतात. हे कसं सहन करायचं आपण. भाऊ.. तुम्ही सांगा .. आदेश द्या, काय करायचं ते.. XXX लंगडा.. दर वेळेस काही ना काही घेऊन येतो…’ भाजपचे उत्तर महाराष्ट्र संयोजक विजय चौधरी आणि राज्याचे कॅबिनेट मंत्री गिरीश महाजन यांच्यातील एका कथित ऑडिओ क्लिपने सध्या महाराष्ट्राच्या राजकारणात मोठी खळबळ उडवून दिली आहे.
Discussion about this post