छत्रपती संभाजीनगर : कॉक्रोच जनता पार्टी (CJP)चे संस्थापक अभिजीत दीपके यांनी माध्यमांशी संवाद साधताना पंतप्रधान नरेंद्र मोदी, केंद्रीय गृहमंत्री अमित शहा आणि केंद्र सरकारच्या कार्यपद्धतीवर जोरदार टीका केली. तसेच भाजपमध्ये प्रवेश करण्यासाठी आपल्यावर दबाव टाकण्यात आला आणि जीवे मारण्याच्या धमक्या देण्यात आल्याचा दावाही त्यांनी केला.
अभिजीत दीपके म्हणाले की, भाजपमध्ये प्रवेश करण्यासाठी त्यांना अनेकदा ऑफर देण्यात आल्या. मात्र कोणत्याही परिस्थितीत आपण भाजपमध्ये जाणार नसल्याचे त्यांनी स्पष्ट केले. “मला भाजपमध्ये जायचे असते तर मी यापूर्वीच गेलो असतो. आंदोलन मागे घ्या, अन्यथा गोळ्या घालू, अशा प्रकारच्या धमक्या मला आणि माझ्या कुटुंबीयांनाही देण्यात आल्या,” असा दावा त्यांनी केला.
यावेळी त्यांनी पंतप्रधान नरेंद्र मोदी आणि अमित शहा यांच्यावरही टीका केली. “एका ३० वर्षांच्या तरुणाला धमक्या देणे योग्य नाही. लोकशाहीमध्ये विरोधी मत मांडणाऱ्यांना घाबरवण्याचा प्रयत्न होऊ नये,” असे ते म्हणाले.
देशातील सध्याच्या राजकीय परिस्थितीवर भाष्य करताना दीपके यांनी व्यक्तिपूजेवरही टीका केली. “एखाद्या व्यक्तीला संविधान आणि देशापेक्षा मोठे मानण्याची प्रवृत्ती लोकशाहीसाठी धोकादायक आहे. बेरोजगारी, शिक्षण, आरोग्य आणि इतर मूलभूत प्रश्नांवर चर्चा होण्याऐवजी व्यक्तीभोवतीच राजकारण फिरत आहे,” असे त्यांनी म्हटले.
दरम्यान, अभिजीत दीपके यांनी केलेल्या या आरोपांवर भाजपकडून किंवा संबंधित नेत्यांकडून वृत्त लिहिपर्यंत कोणतीही अधिकृत प्रतिक्रिया समोर आलेली नव्हती. त्यांच्या दाव्यांची स्वतंत्रपणे पुष्टी झालेली नाही.
Discussion about this post