मुंबई : UG-NEET 2026 परीक्षेतील कथित पेपरफुटी प्रकरणावरून देशभरात सुरू असलेल्या वादात आता आणखी एक धक्कादायक दावा समोर आला आहे. शरदचंद्र पवार राष्ट्रवादी काँग्रेसचे आमदार रोहित पवार यांनी NEET फेरपरीक्षेचाही प्रश्न उपस्थित करत, फेरपरीक्षेचा पेपर तीन दिवस आधीच गुजरातमधून फुटल्याचा गंभीर आरोप केला आहे. या दाव्यामुळे शिक्षण क्षेत्रात आणि राजकीय वर्तुळात मोठी खळबळ उडाली आहे.
रोहित पवार यांनी सोशल मीडिया प्लॅटफॉर्म ‘एक्स’ वर पोस्ट करत म्हटले आहे की, NEET पेपरफुटीनंतर घेण्यात आलेल्या फेरपरीक्षेचाही पेपर तीन दिवस आधी गुजरातमधून लीक झाल्याच्या बातम्या समोर येत आहेत. हा दावा खरा असेल, तर ही अत्यंत गंभीर बाब असून विद्यार्थ्यांच्या भवितव्याशी पुन्हा एकदा खेळ झाल्याचे स्पष्ट होईल, असे त्यांनी म्हटले आहे.
या प्रकरणाची तातडीने चौकशी करून सत्य समोर आणावे, तसेच पेपरफुटी झाली असल्यास कोणत्याही दबावाला बळी न पडता संपूर्ण रॅकेट उघड करावे, अशी मागणीही त्यांनी केली आहे. आपल्या आरोपांच्या समर्थनार्थ रोहित पवार यांनी काही स्क्रीनशॉट, ई-मेल आणि संभाषणाचे पुरावे सोशल मीडियावर शेअर करत त्याची लिंकही पोस्ट केली आहे.
दरम्यान, NEET पेपरफुटी प्रकरणानंतर देशभरात तीव्र आंदोलन झाले होते. त्यानंतर केंद्र सरकारने फेरपरीक्षा घेतली आणि शिक्षण मंत्रालयातही बदल झाले. आता फेरपरीक्षेच्याच पेपरफुटीचा दावा समोर आल्याने हे प्रकरण आणखी गंभीर बनले आहे.
सध्या संसदेत अँटी पेपर लीक कायद्यातील सुधारणांवर चर्चा सुरू असताना या नव्या आरोपामुळे विरोधकांना सरकारवर हल्लाबोल करण्याची संधी मिळण्याची शक्यता आहे. मात्र, रोहित पवार यांनी केलेल्या आरोपांबाबत अद्याप अधिकृत तपास यंत्रणा किंवा केंद्र सरकारकडून कोणतीही पुष्टी झालेली नाही. अशा परिस्थितीत या प्रकरणातील सत्य तपासानंतरच स्पष्ट होणार आहे.
Discussion about this post