मुंबई । राज्यातील राजकीय वर्तुळातून एक मोठी आणि खळबळजनक बातमी समोर आली आहे. ओबीसी नेते लक्ष्मण हाके यांचा एक व्हिडिओ सध्या सोशल मीडियावर प्रचंड व्हायरल होत आहे. या व्हिडिओमध्ये हाके काही नेत्यांबाबत अत्यंत वादग्रस्त वक्तव्य करताना दिसत असून, त्यांचा रोख नेमका कोणाकडे आहे? यावरून आता तर्कवितर्कांना उधाण आले आहे.
व्हायरल व्हिडिओमध्ये नेमकं काय आहे?
सोशल मीडियावर व्हायरल झालेल्या या व्हिडिओमध्ये लक्ष्मण हाके एका आंदोलनाचा आणि नेत्यांचा संदर्भ देत आहेत. व्हिडिओत ते म्हणतात, “त्याला आपल्यामागे फरफट व्हावी लागली आहे. त्याच्याकडे यंत्रणा आणि संघटना आहे. मीडिया हँडल करणं, स्टेज डेकोरेट करणं, मीडियाला प्रॉपर बातमी देणे हे सर्व तो करतो. त्याने एकदा आंदोलन करायचे, मी दुसऱ्या दिवशी आंदोलन जाहीर केले. जीआरची होळी करायची… माझ्या उपस्थितीत म्हटलं आंदोलन थांबवा, मी त्या स्टेजवर होतो. तो दोन उपमुख्यमंत्र्यांना आणि मुख्यमंत्र्यांना भेटायला गेला. सोबत कोणाला घेऊन गेला? स्वतःचा पुतण्या आणि स्वतःचा पोरगा… असे तिघेजण गेले. हे वाक्य मला लय खटकलं होतं. पण आता जाऊदे, आपल्या मागे देवेंद्र फडणवीस, पंकजा मुंडे आणि बावनकुळे उभे राहू शकतात.”
या व्हिडिओमध्ये ‘तो, पुतण्या आणि मुलगा’ असा उल्लेख आल्याने हाके यांनी नेमका कोणावर निशाणा साधला, याबाबत राजकीय वर्तुळात जोरदार चर्चा सुरू झाली आहे.हा व्हिडिओ व्हायरल झाल्यानंतर आणि सोशल मीडियावर उलट-सुलट प्रतिक्रिया उमटायला लागल्यानंतर खुद्द लक्ष्मण हाके यांनी प्रसारमाध्यमांशी बोलताना आपली बाजू स्पष्ट केली आहे.
हाके म्हणाले, “हा व्हिडिओ नक्कीच जुना आहे, पण तो कधीचा आहे हे मी सांगू शकत नाही. कुणीतरी खोडसाळपणा करून दोन ते तीन वेळा कट केलेला (एडिट केलेला) व्हिडिओ सोशल मीडियावर टाकला आहे. हिंमत असेल तर दाखवणाऱ्यांनी पूर्ण व्हिडिओ दाखवावा. माझा रोख हा ओबीसींचे हक्क डावलणाऱ्या सत्ताधारी, मंत्री आणि विरोधकांकडे आहे. ओबीसींच्या बाजूने आज कुठलेही मंत्री, आमदार किंवा खासदार बोलायला तयार नाहीत, मी त्या व्यवस्थेविरोधात बोलत आहे.”
Discussion about this post