जळगाव । नोव्हेंबर महिन्याचा अर्धा टप्पा पार पडला असला तरी राज्यातील उन्हाचा जोर अद्याप कायम आहे. जळगावसह राज्यातील अनेक भागांत दुपारच्या वेळी कडक ऊन जाणवत आहे. दुसरीकडे पहाटेच्या वेळी किमान तापमानात घट होत असल्याने गारठा वाढला आहे. त्यामुळे सध्या सकाळी थंडी आणि दुपारी कडक ऊन, असे विरोधाभासी हवामान अनुभवायला मिळत आहे.
गेल्या काही दिवसांपासून राज्यातील कमाल आणि किमान तापमानात मोठी तफावत पाहायला मिळत आहे. कमाल तापमान म्हणजे दिवसा नोंदवले जाणारे सर्वाधिक तापमान, तर किमान तापमान म्हणजे रात्री किंवा पहाटे नोंदवले जाणारे सर्वात कमी तापमान होय. सध्या या दोन्ही तापमानांमध्ये अनेक ठिकाणी १४ ते २१ अंश सेल्सिअसपर्यंत फरक नोंदवला जात आहे.
जळगावसह धुळे, निफाडमध्ये २१ अंशांचा फरक
विशेष म्हणजे जळगाव, धुळे आणि निफाड येथे दिवसा आणि पहाटेच्या तापमानात तब्बल २१ अंश सेल्सिअसची तफावत नोंदवण्यात आली आहे. त्यामुळे या भागात पहाटे थंड वातावरण, तर दुपारनंतर उन्हाचा चांगलाच चटका जाणवत आहे.
जळगावमध्येही पहाटेच्या वेळी गारवा वाढत असला तरी सूर्य वर येताच तापमानात झपाट्याने वाढ होत आहे. त्यामुळे सकाळी स्वेटर किंवा उबदार कपड्यांची गरज भासत असताना दुपारी उन्हापासून बचाव करण्याची वेळ नागरिकांवर येत आहे.
नोव्हेंबरमध्येही उन्हाचा चटका कायम
साधारणपणे नोव्हेंबर महिन्यात थंडीची चाहूल लागून वातावरणात गारवा वाढण्यास सुरुवात होते. मात्र, यंदा नोव्हेंबरचा अर्धा महिना उलटूनही दुपारचे तापमान तुलनेने अधिक असल्याने उन्हाचा त्रास कायम आहे. पहाटे थंडी जाणवत असली तरी दुपारच्या वेळी उन्हामुळे उकाडा वाढत आहे.
दरम्यान, राज्यातील कमाल आणि किमान तापमानात पुढील काही दिवस चढ-उतार कायम राहण्याची शक्यता हवामान विभागाने व्यक्त केली आहे. त्यामुळे जळगावसह राज्यात आगामी काळातही सकाळी गारवा आणि दुपारी उन्हाचा चटका, असेच बदलते हवामान अनुभवायला मिळण्याची शक्यता आहे.
Discussion about this post