जळगाव : जळगाव तालुका पोलीस ठाण्याच्या हद्दीत गुन्हेगारांचे मनोबल वाढल्याचे पुन्हा एकदा समोर आले आहे. अवघ्या ११ दिवसांपूर्वी दुचाकीस्वाराला अडवून लुटल्याची घटना ताजी असतानाच शुक्रवारी मध्यरात्री महामार्गावर ट्रक चालकावर जीवघेणा हल्ला करून रोख रक्कम आणि ऑनलाईन पैशांची लूट केल्याची धक्कादायक घटना घडली. मात्र, जळगाव तालुका पोलिसांनी अवघ्या १२ तासांत धडक कारवाई करत या प्रकरणातील तीन सराईत गुन्हेगारांना अटक केली असून एका अल्पवयीन विधीसंघर्षित बालकाला ताब्यात घेतले आहे.
पोलिसांनी दिलेल्या माहितीनुसार, जालना येथील ट्रक चालक मुकेश रामराव राठोड (वय ३०) हे २० जून रोजी मध्यरात्री १ वाजेच्या सुमारास त्यांचा ट्रक (एमएच-२१ बीएच-३५३६) घेऊन पाळधी परिसरातून जात होते. त्यावेळी चारचाकी आणि दुचाकीवरून आलेल्या चार जणांनी महामार्गावर ट्रकसमोर कार आडवी लावून त्यांचा मार्ग अडवला.
मुख्य आरोपी साहिल शेख उर्फ काल्या आणि त्याच्या साथीदारांनी सुरुवातीला ट्रकवर दगडफेक केली. त्यानंतर चालक मुकेश राठोड आणि त्यांच्या क्लीनरला खाली ओढून बेदम मारहाण करण्यात आली. हल्लेखोरांपैकी एका आरोपीने चालकाच्या उजव्या हातावर चाकूने सलग तीन वार करत त्यांना गंभीर जखमी केले.
रोकड कमी वाटल्याने ‘डिजिटल दरोडा’
आरोपींनी जखमी चालकाच्या खिशातील ५ हजार ५०० रुपये रोख रक्कम हिसकावून घेतली. मात्र, एवढ्यावर न थांबता त्यांनी चालकाचा मोबाईल ताब्यात घेऊन ‘फोन पे’ अॅपच्या माध्यमातून ९८४ रुपये ऑनलाईन ट्रान्सफर करून घेतले. त्यानंतर आरोपी घटनास्थळावरून पसार झाले. जखमी चालकावर सध्या जळगाव येथील शासकीय वैद्यकीय महाविद्यालय व रुग्णालयात उपचार सुरू आहेत.
या प्रकरणी जळगाव तालुका पोलीस ठाण्यात भारतीय न्याय संहिता (BNS) कलम ३०९(६), १२६(२), ११५(२), ३५१(२), ३५१(३) व ३(५) अन्वये गुन्हा दाखल करण्यात आला आहे.
१२ तासांत आरोपींचा शोध
घटनेचे गांभीर्य लक्षात घेऊन वरिष्ठ पोलीस निरीक्षक शशिकांत पाटील यांनी गुन्हे शोध (डीबी) पथकाला तपासासाठी रवाना केले. गुप्त माहिती व तांत्रिक तपासाच्या आधारे पोलिसांनी अवघ्या १२ तासांत तीन आरोपींना अटक केली, तर एका अल्पवयीन विधीसंघर्षित बालकाला ताब्यात घेतले.
अटक करण्यात आलेल्या आरोपींमध्ये साहिल शेख जब्बार शेख उर्फ काल्या (रा. पाळधी, ता. धरणगाव), विशाल चुडामण पाटील (रा. बिबानगर, जळगाव) आणि मोहित हेमंत गुजर (रा. मयूर कॉलनी, पिंप्राळा, जळगाव) यांचा समावेश आहे.
आरोपींवर यापूर्वीही गंभीर गुन्हे
मुख्य आरोपी साहिल शेख उर्फ काल्या हा सराईत गुन्हेगार असून त्याच्याविरुद्ध धरणगाव पोलीस ठाण्यात एसटी बस चालकाला मारहाण केल्याचा गुन्हा दाखल आहे. तसेच आरोपी विशाल पाटील याच्याविरुद्ध रामानंद नगर पोलीस ठाण्यात गंभीर स्वरूपाचे गुन्हे नोंद असल्याची माहिती पोलिसांनी दिली.
वरिष्ठांच्या मार्गदर्शनाखाली कारवाई
ही यशस्वी कारवाई पोलीस अधीक्षक श्रीकांत धीवरे, अपर पोलीस अधीक्षक संदीप गावित, उपविभागीय पोलीस अधिकारी नितीन गणापुरे यांच्या मार्गदर्शनाखाली वरिष्ठ पोलीस निरीक्षक शशिकांत पाटील, सहाय्यक पोलीस निरीक्षक नयन पाटील तसेच डीबी पथकातील प्रदीप राजपूत, योगेश पाटील, अविनाश देवरे, कैलास इंगळे, पंकज देशमुख, प्रशांत ठाकूर, मिलिंद सपकाळे आणि गणेश पाटील यांनी पार पाडली.
Discussion about this post