जळगाव/पुणे । मान्सूनचा परतीचा प्रवास सुरू असतानाच महाराष्ट्रात उन्हाचा चटका आणि उकाडा मोठ्या प्रमाणावर वाढला असून, नागरिकांना ‘ऑक्टोबर हीट’चा त्रास जाणवू लागला आहे. राज्यातील बहुतांश भागांत कमाल तापमान ३५ अंश सेल्सिअसच्या पुढे गेले आहे. अशातच हवामान विभागाने कोल्हापूर आणि सांगली जिल्ह्यांत विजांसह पावसाचा अंदाज वर्तवला आहे, तर उर्वरित राज्यात हवामान कोरडे व उष्ण राहण्याची शक्यता आहे.
महाराष्ट्राच्या निम्म्या भागातून मान्सूनची माघार
महाराष्ट्राच्या निम्म्या भागातून मान्सूनने माघार घेतली असून, त्याच्या पुढील परतीसाठी हवामान सध्या पूर्णपणे पोषक आहे. त्यामुळे पुढील दोन ते तीन दिवसांत राज्यातील आणखी काही भागांतून मान्सून पूर्णपणे परतण्याची शक्यता हवामान विभागाने व्यक्त केली आहे. सध्या पश्चिम बंगालच्या हिमालयाकडील भागापासून विदर्भ, मराठवाडा, कर्नाटक आणि गोव्यापर्यंत समुद्रसपाटीपासून ५.८ किलोमीटर उंचीवर हवेचा कमी दाबाचा पट्टा सक्रिय आहे. तसेच मध्य महाराष्ट्रापासून मन्नारच्या आखातापर्यंत आणखी एक कमी दाबाचा पट्टा तयार झाला आहे.
अमरावतीमध्ये सर्वाधिक तापमान, तर जळगावमध्ये निचांकी किमान तापमानाची नोंद
राज्यात उन्हाचा आणि उकाड्याचा जोर वाढल्याने कमाल तापमानात मोठी वाढ झाली आहे. बुधवारी सकाळपर्यंतच्या २४ तासांत अमरावतीमध्ये राज्यातील सर्वाधिक ३९.६ अंश सेल्सिअस तापमानाची नोंद झाली, तर वर्ध्यामध्ये ३८ अंश तापमान राहिले. याशिवाय अकोला, जळगाव, छत्रपती संभाजीनगर, सोलापूर, धुळे आणि चंद्रपूरमध्ये कमाल तापमान ३७ अंश सेल्सिअसपेक्षा जास्त नोंदवले गेले.
दरम्यान, एका बाजूला उष्णतेची लाट असतानाच दुसरीकडे तापमानातील तीव्र तफावत जळगावमध्ये दिसून आली. जळगावमध्ये कमाल तापमान ३७.५ अंश सेल्सिअस नोंदवले गेले, तर राज्यातील सर्वात कमी म्हणजेच १७.२ अंश सेल्सिअस इतके नीचांकी किमान तापमान जळगावमध्येच नोंदवण्यात आले. यामुळे जळगावकरांना दिवसा कडक ऊन आणि रात्री गारवा असा संमिश्र अनुभूती येत आहे.
Discussion about this post