जळगाव । राज्य सरकारने आयएएस अधिकाऱ्यांच्या बदल्या करण्याची परंपरा कायम ठेवली आहे. नुकत्याच झालेल्या आयएएस अधिकाऱ्यांच्या बदल्यांमध्ये जळगाव महानगरपालिकेचे आयुक्त ज्ञानेश्वर ढेरे यांचा समावेश आहे. त्यांच्या जागी २०२१ बॅचचे आयएएस अधिकारी आदित्य जीवने यांची जळगाव महापालिकेच्या आयुक्तपदी नियुक्ती करण्यात आली आहे.
आदित्य जीवने हे सध्या छत्रपती संभाजीनगर येथे महावितरणमध्ये संयुक्त संचालक म्हणून कार्यरत आहेत. तरुण, अभ्यासू आणि गतिमान अधिकारी अशी त्यांची ओळख असून, त्यांच्या नियुक्तीमुळे जळगाव महापालिकेच्या प्रशासनाला नवी दिशा मिळण्याची अपेक्षा व्यक्त केली जात आहे.
दरम्यान, विद्यमान आयुक्त ज्ञानेश्वर ढेरे यांची बदली निश्चित झाली असली तरी त्यांची पुढील नियुक्ती नेमकी कुठे करण्यात आली आहे, याबाबत अद्याप अधिकृत माहिती समोर आलेली नाही.
राज्य शासनाच्या या निर्णयानंतर जळगाव महापालिकेत नव्या आयुक्तांच्या स्वागताची तयारी सुरू झाली असून, शहरातील प्रलंबित प्रश्न, विकासकामे आणि प्रशासनातील सुधारणांबाबत आदित्य जीवने कोणती भूमिका घेतात, याकडे आता जळगावकरांचे लक्ष लागले आहे.
Discussion about this post