जळगावात तब्बल २८ लाख रुपयांचा प्रतिबंधित गुटखा जप्त, बोलेरोसह चालक ताब्यात

जळगाव: जिल्ह्यात अवैध धंद्यांविरोधात सुरू असलेल्या धडक मोहिमेअंतर्गत एमआयडीसी पोलिसांनी एक मोठी कारवाई केली आहे. जळगाव शहरात महाराष्ट्रात प्रतिबंधित असलेल्या तब्बल २८ लाख ८१ हजार ६०० रुपयांचा गुटखा आणि पानमसाल्याचा साठा पोलिसांनी जप्त केला आहे. या कारवाईत गुटख्याची वाहतूक करणारे मालवाहू बोलेरो वाहन जप्त करण्यात आले असून, चालकाविरुद्ध गुन्हा दाखल करण्यात आला आहे.

गुप्त माहितीच्या आधारे रचला सापळा
जिल्हा पोलीस अधीक्षक श्रीकांत धिवरे यांच्या निर्देशानुसार सध्या जिल्ह्यात अवैध व्यवसायांविरोधात विशेष मोहीम राबविण्यात येत आहे. यादरम्यान, एमआयडीसी पोलीस ठाण्याचे पोलीस निरीक्षक बबन आव्हाड यांना ९ जून रोजी एक गोपनीय माहिती मिळाली. जळगाव शहरातील महामार्गावरून महाराष्ट्र राज्यात बंदी असलेल्या गुटख्याची मोठी वाहतूक केली जाणार असल्याचे या माहितीून समोर आले होते. माहिती मिळताच पोलीस निरीक्षक आव्हाड यांनी पोलीस उपनिरीक्षक चंद्रकांत धनके आणि पोलीस कर्मचाऱ्यांचे एक विशेष पथक तयार करून कारवाईचे आदेश दिले. या पथकाने अजिंठा चौक ते इच्छादेवी चौक दरम्यान महामार्गावरील जिओ पेट्रोलपंप परिसरात अत्यंत गोपनीयतेने सापळा रचला.

सापळा रचलेला असतानाच, महामार्गावरून एक संशयित बोलेरो मालवाहू वाहन येताना दिसले. पोलिसांनी तत्परता दाखवत ते वाहन शिताफीने अडविले. वाहन चालकाकडे चौकशी केली असता त्याने पोलिसांना समाधानकारक उत्तरे दिली नाहीत. त्यामुळे संशय बळावल्याने पोलिसांनी वाहनाची कसून तपासणी केली.तपासणीदरम्यान वाहनाच्या मागील भागात महाराष्ट्र राज्यात विक्री, साठवणूक आणि वाहतुकीस पूर्णपणे बंदी असलेला ‘विमल सुगंधित गुटखा’ आणि पानमसाल्याचा मोठा साठा आढळून आला. पोलिसांनी त्वरित अन्न व औषध प्रशासन विभागाच्या (FDA) अधिकाऱ्यांना घटनास्थळी पाचारण करून रीतसर पंचनामा केला.

जप्त करण्यात आलेला मुद्देमाल:
प्रतिबंधित विमल गुटखा व पानमसाला: २१ लाख ८१ हजार ६०० रुपये किमतीच्या एकूण ५८ गोण्या.
महिंद्रा बोलेरो वाहन: ७ लाख रुपये किमतीचे मालवाहू वाहन (क्रमांक MH-19 CX-3280).
एकूण जप्त मुद्देमाल: २८ लाख ८१ हजार ६०० रुपये.

धरणगावच्या चालकाविरुद्ध गुन्हा दाखल
या कारवाईदरम्यान पोलिसांनी वाहनाचा चालक जोगेंद्र भिका पाटील (वय वर्ष आणि रा. फुलपाट, ता. धरणगाव) याला ताब्यात घेतले आहे. या प्रकरणी एमआयडीसी पोलीस ठाण्यात गुन्हा क्रमांक ५२७/२०२६ नुसार अन्न सुरक्षा व मानके कायदा २००६ मधील विविध कलमांसह भारतीय न्याय संहितेच्या (BNS) कलम १२३, २२३, २७४ व २७५ अन्वये गुन्हा दाखल करण्यात आला आहे. या प्रकरणाचा पुढील तपास पोलीस उपनिरीक्षक चंद्रकांत धनके आणि पोलीस कर्मचारी योगेश घुगे करत आहेत.

यांच्या मार्गदर्शनाखाली झाली कारवाई:

ही धडक कारवाई पोलीस अधीक्षक श्रीकांत धिवरे, अप्पर पोलीस अधीक्षक संदीप गावीत, पोलीस उपअधीक्षक नितीन गणापुरे, पोलीस निरीक्षक बबन आव्हाड तसेच अन्न व औषध प्रशासन विभागाचे सहाय्यक आयुक्त संतोष कांबळे व त्यांच्या पथकाच्या मार्गदर्शनाखाली यशस्वीपणे पार पाडण्यात आली. या कारवाईमुळे जळगावमधील अवैध गुटखा तस्करांचे धाबे दणाणले आहेत.