भुसावळ । जळगाव जिल्ह्यात लाचखोरीच्या घटनांमध्ये वाढ होताना दिसत असून अशातच भुसावळमधून लाचखोरीच्या मोठी बातमी समोर आलीय. सावकारी परवाना मंजूर करून देण्यासाठी ३० हजार रुपयांची लाच मागून ती स्वीकारल्याप्रकरणी जळगाव एसीबीने भुसावळच्या सहाय्यक निबंधक कार्यालयातील सहकार अधिकारी आणि दोन प्रमाणित लेखापरीक्षकांविरुद्ध गुन्हा दाखल केले. दरम्यान, या प्रकरणातील मुख्य सूत्रधार असलेला वर्ग-३ चा सहकार अधिकारी विजय विनायकराव गरूड (वर्ग-३, सहकार अधिकारी, रा. धुळे) हा एसीबीचा सुगावा लागताच पसार झाला आहे. तर सुरेश जनार्दन विसपुते (प्रमाणित लेखापरीक्षक, रा. भुसावळ) आणि हेमंत प्रकाश काळे (प्रमाणित लेखापरीक्षक, रा. जळगाव) या दोघांना अटक केली आहे. या कारवाईमुळे सहकार विभागात एकच खळबळ उडाली आहे.
एसीबीने दिलेल्या माहितीनुसार, तक्रारदार हे भुसावळ येथील रहिवासी असून त्यांना सावकारी व्यवसायासाठी परवाना घ्यावयाचा होता. त्यासाठी त्यांनी ३० मार्च २०२६ रोजी सहाय्यक निबंधक, सहकारी संस्था कार्यालय, भुसावळ येथे अर्ज दाखल केला होता. परवाना मंजूर करून देण्यासाठी सहकार अधिकारी विजय गरूड यांनी २० हजार रुपयांची लाच मागितल्याचा आरोप असून त्यांनी तक्रारदारास प्रमाणित लेखापरीक्षक सुरेश विसपुते यांना भेटण्यास सांगितले होते.
याबाबत तक्रारदाराने २३ एप्रिल २०२६ रोजी लाचलुचपत प्रतिबंधक विभाग, जळगाव येथे तक्रार दाखल केली. त्यानंतर एसीबीने लाचमागणी पडताळणी कारवाई केली असता, सुरेश विसपुते यांनी तक्रारदाराकडे सहकार अधिकारी गरूड, स्वतः आणि दुसरे प्रमाणित लेखापरीक्षक हेमंत काळे यांच्यासाठी मिळून एकूण ३० हजार रुपयांची लाच मागितल्याचे निष्पन्न झाले.
त्यानुसार सोमवारी (१५ जून) एसीबीने सापळा रचला. भुसावळ शहरातील नाहाटा चौफुली परिसरात सुरेश विसपुते यांनी तक्रारदाराकडून पंचांसमक्ष ३० हजार रुपयांची लाच स्वीकारली. त्याआधी त्यांनी हेमंत काळे यांच्याशी दूरध्वनीवरून संपर्क साधून तक्रारदाराशी बोलणे करून दिले. तसेच लाच स्वीकारण्यास प्रोत्साहन दिल्याचे तपासात समोर आले आहे. याशिवाय स्वीकारलेल्या लाच रकमेपैकी ५ हजार रुपये सहकार अधिकारी विजय गरूड यांच्या सांगण्यावरून त्यांना फोन-पेच्या माध्यमातून पाठविण्यात आल्याची बाबही उघडकीस आली आहे. मात्र, याच दरम्यान कारवाईची कुणकुण लागल्याने सहकार अधिकारी विजय गरुड हा घटनास्थळावरून पसार होण्यात यशस्वी ठरला.
या प्रकरणी बाजारपेठ पोलीस ठाण्यात तिघांविरुद्ध गुन्हा दाखल आला असून दोन जणांना अटक करण्यात आलीय. तर फरार अधिकारी विजय गरुड याचा पोलीस शोध घेत आहेत.
ही सापळा कारवाई हेमंत खंडू नागरे, पोलीस निरीक्षक, लाचलुचपत प्रतिबंधक विभाग, जळगाव यांच्या मार्गदर्शनाखाली पार पडली. या पथकात पोलीस उपनिरीक्षक दिनेशसिंग पाटील, सुरेश पाटील, पोलीस हवालदार किशोर महाजन, पोलीस निरीक्षक रेश्मा अवतारे, पोलीस कॉन्स्टेबल प्रणेश ठाकूर व बाळू मराठे यांचा सहभाग होता. या प्रकरणाचा पुढील तपास पोलीस निरीक्षक रिमता नवघरे करीत आहेत. या कारवाईसाठी पोलीस अधीक्षक भारत तांगडे तसेच अपर पोलीस अधीक्षक माधव रेड्डी आणि सुनील दोरगे यांचे मार्गदर्शन लाभले.
Discussion about this post