जयपूर । ‘नीट’ (NEET) पेपरफुटी प्रकरणावरून देशभरात वातावरण तापले असतानाच, या घोटाळ्याविरोधात आक्रमक भूमिका घेणारे ‘कॉकरोच जनता पक्षा’चे संस्थापक अध्यक्ष अभिजीत दीपके यांना राजस्थानच्या जयपूरमध्ये एका आंदोलनादरम्यान मारहाण झाल्याची धक्कादायक घटना घडली आहे. एका अज्ञात व्यक्तीने दीपके यांच्यावर थेट हल्ला केला असून, या घटनेनंतर आंदोलनस्थळी आणि राजकीय वर्तुळात प्रचंड तणावाचे वातावरण निर्माण झाले आहे. या मारहाणीचा थरारक व्हिडिओ सोशल मीडियावर प्रचंड व्हायरल होत आहे.
‘नीट’ पेपरफुटीच्या विरोधात कॉकरोच जनता पक्षाकडून देशभरात ठिकठिकाणी आंदोलने केली जात आहेत. दिल्लीतील जंतर-मंतर आणि पुण्यात यशस्वी आंदोलन केल्यानंतर अभिजीत दीपके हे शेकडो तरुणांच्या उपस्थितीत जयपूरमध्ये आंदोलनासाठी पोहोचले होते. आंदोलनस्थळी पोहोचताच जमलेल्या तरुणांनी दीपके यांचे जंगी स्वागत केले. काही उत्साही तरुणांनी त्यांना खांद्यावर घेतले असतानाच, गर्दीचा फायदा घेऊन एका अज्ञात तरुणाने पुढे येत दीपके यांना थेट मारहाण करण्यास सुरुवात केली.
अभिजीत दीपके यांच्यावर झालेल्या या अचानक हल्ल्यामुळे एकच खळबळ उडाली. मात्र, तेथे उपस्थित असलेल्या कार्यकर्त्यांनी आणि तरुणांनी तातडीने संबंधित हल्लेखोर तरुणाला जागीच घेरले आणि त्याची धुलाई करण्यास सुरुवात केली. यामुळे काही काळ आंदोलनस्थळी प्रचंड गोंधळ आणि तणाव निर्माण झाला होता. परिस्थिती हाताबाहेर जात असल्याचे पाहून स्वतः अभिजीत दीपके यांनी कार्यकर्त्यांना शांत राहण्याचे आणि संयम बाळगण्याचा सल्ला दिला.
शिक्षणमंत्र्यांच्या राजीनाम्याची होती मागणी
या आंदोलनाच्या माध्यमातून ‘नीट’ परीक्षेतील गोंधळावर बोट ठेवत केंद्रीय शिक्षण मंत्री धर्मेंद्र प्रधान यांच्या राजीनाम्याची मागणी केली जात होती. देशभरातील लाखो विद्यार्थ्यांच्या भविष्याचा खेळ करणाऱ्या दोषींवर कडक कारवाई व्हावी, यासाठी हे तरुण एकवटले होते. मात्र, ऐन आंदोलनातच हा हल्ला झाल्याने आंदोलन दडपण्याचा हा प्रयत्न तर नाही ना? अशी शंका उपस्थित केली जात आहे.
सुरक्षेचा प्रश्न ऐरणीवर; आधीच मिळाली होती जीवे मारण्याची धमकी
काही महिन्यांपूर्वीच अभिजीत दीपके यांना सोशल मीडियाच्या माध्यमातून जीवे मारण्याची थेट धमकी मिळाली होती. त्यानंतर पोलिसांनी त्यांच्या सुरक्षेसाठी घराबाहेर पोलीस बंदोबस्तही तैनात केला होता. धमकीची पर्वा न करता दीपके देशभरात सातत्याने आंदोलने करत आहेत; मात्र आता थेट जयपूरमधील आंदोलनात त्यांच्यावर शारीरिक हल्ला झाल्यामुळे दीपके यांच्या सुरक्षेचा प्रश्न अत्यंत ऐरणीवर आला आहे.
Discussion about this post