पुणे । पुण्यात MPSC परीक्षांमधील कथित घोटाळे, पेपरफुटी आणि भरती प्रक्रियेतील दिरंगाईच्या निषेधार्थ विद्यार्थ्यांचे तीव्र आंदोलन सुरू आहे. या आंदोलनात सहभागी होत राष्ट्रवादी काँग्रेस शरद पवार गटाच्या नेत्या रोहिणी खडसे यांनी विद्यार्थ्यांच्या प्रश्नांवरून सरकारला धारेवर धरले. या मुद्द्यावरून आता राज्यातील सत्ताधारी आणि विरोधकांमध्ये जोरदार राजकीय कलारंग पाहायला मिळत असून, रोहिणी खडसे आणि भाजप नेत्या चित्रा वाघ यांच्यात शाब्दिक युद्ध पेटले आहे.
रोहिणी खडसेंचा सरकारवर गंभीर आरोप
पुण्यातील आंदोलनस्थळी पोहोचलेल्या रोहिणी खडसे यांनी महायुती सरकारवर तीव्र शब्दांत टीका केली. परीक्षांमधील गैरप्रकार आणि सततच्या पेपरफुटीमुळे लाखो तरुण विद्यार्थ्यांच्या भवितव्याचा प्रश्न निर्माण झाला आहे, असे सांगत त्यांनी सरकारने विद्यार्थ्यांच्या मागण्यांची गांभीर्याने दखल घ्यावी, अशी आग्रही मागणी केली.
यावेळी बोलताना खडसे यांनी सरकारमधील महिला नेतृत्वाच्या भूमिकेवर प्रश्न उपस्थित करत भाजप नेत्या चित्रा वाघ यांच्यावर निशाणा साधला. “काळ्याकुट्ट नकली भुवया घेऊन.. अगं बाई तू ये” अशा शब्दांत त्यांनी टीका केली. तसेच, विद्यार्थ्यांच्या आंदोलनाला ‘नौटंकी’ म्हणणाऱ्यांनी प्रत्यक्ष आंदोलनस्थळी येऊन विद्यार्थ्यांची व्यथा समजून घ्यावी, असा चिमटाही त्यांनी काढला. गरीब आणि मध्यमवर्गीय कुटुंबातील पालक आपल्या मुलांना अधिकारी बनवण्यासाठी अहोरात्र कष्ट घेतात, याची जाणीव नेत्यांना असली पाहिजे, असे त्या म्हणाल्या.
चित्रा वाघ यांचे रोहिणी खडसेंना प्रत्युत्तर
रोहिणी खडसेंच्या या आक्रमक टीकेला चित्रा वाघ यांनीही तितक्याच आक्रमकपणे सोशल मीडियाच्या माध्यमातून प्रत्युत्तर दिले आहे.चित्रा वाघ यांनी म्हटले की, “माझ्यावर चिखलफेक करण्याआधी ‘तुतारी’च्या ‘पिपाणी’ने स्वतःच्या गिरेबानात डोकावून पहावं. तुमची नीतीमत्ता काय? खरं तर कोणाच्याही वैयक्तिक आयुष्यावर मला बोलायला आवडत नाही. पण जेव्हा रोहिणी खडसेंसारखे लोक जास्त शहाणपणा करतात आणि राजकीय टीकेच्या सर्व पातळ्या ओलांडतात, तेव्हा त्यांना अशी आठवण करून द्यावीच लागते.”
तसेच, MPSC च्या विद्यार्थ्यांसमोर बोलताना विषय काय आहे आणि आपण काय बोलतोय, याचे किमान भान तरी ठेवायला हवे, असे सुनावत केवळ टाळ्या मिळवण्यासाठी दुसऱ्या महिलेवर वैयक्तिक टीका करणे योग्य नाही, असा सवालही वाघ यांनी उपस्थित केला. या राजकीय कलह आणि आरोप-प्रत्यारोपांमुळे पुण्यातील विद्यार्थ्यांच्या आंदोलनाला आता पूर्णपणे राजकीय वळण लागल्याचे दिसून येत आहे.
Discussion about this post