शेतकऱ्यांचं राज्यात किती नुकसान झालं? रोहित पवारांनी मांडली धक्कादायक आकडेवारी

मुबई । महाराष्ट्रातील शेतकऱ्यांसमोर यंदा दुष्काळाचे मोठे संकट उभे राहिले आहे. ऐन सणासुदीच्या काळात हातातोंडाशी आलेले पीक पावसाअभावी वाया गेल्याने शेतकऱ्यांचे मोठे आर्थिक नुकसान झाले आहे. पिकांच्या लागवडीसाठी झालेला खर्चही भरून निघत नसल्याने शेतकरी आर्थिक अडचणीत सापडला आहे. राज्य सरकारने दुष्काळ जाहीर केला असला, तरी नुकसानभरपाई आणि सरकारी मदत कधी मिळणार, याकडे शेतकऱ्यांचे लक्ष लागले आहे.

दरम्यान, सरकारकडून शेतकऱ्यांच्या नुकसानीचे योग्य मूल्यमापन झाले नसल्याचा आरोप विरोधकांकडून करण्यात येत आहे. राष्ट्रवादी काँग्रेसचे आमदार रोहित पवार यांनी मुंबईत माध्यमांशी संवाद साधताना दुष्काळ आणि पीक नुकसानीची आकडेवारी मांडत सरकारवर निशाणा साधला.

रोहित पवार म्हणाले की, शरद पवार यांना दुष्काळाची दाहकता माहिती असल्याने त्यांनी सरकारने कोणत्या उपाययोजना कराव्यात, याबाबत पत्र लिहिले आहे. राज्यात यंदा सरासरीपेक्षा कमी पाऊस झाल्याने पेरणीपासूनच शेतकऱ्यांसमोर संकट निर्माण झाले. त्यांच्या कर्जत-जामखेड मतदारसंघात केवळ 40 टक्के पाऊस झाल्याचा दावा त्यांनी केला. त्यामुळे तब्बल 60 टक्के पावसाची तूट असल्याचेही त्यांनी सांगितले.

सोयाबीन, तूर, मका, कापूस, भात यांसह विविध पिकांवर दुष्काळाचा परिणाम झाला आहे. पिकासाठी केलेला खर्च आणि मिळणारे उत्पन्न यामध्ये मोठी तफावत निर्माण झाली असून, शेतकऱ्यांची आर्थिक कोंडी झाली आहे, असे रोहित पवार यांनी म्हटले.

विदर्भातील नुकसानीचा आकडा किती?

रोहित पवार यांनी विदर्भातील पीक नुकसानीकडेही लक्ष वेधले. त्यांच्या दाव्यानुसार, राज्यातील शेतकऱ्यांचे एकूण 35,984 कोटी रुपयांचे नुकसान झाले आहे. यापैकी विदर्भातील शेतकऱ्यांचे तब्बल 22,456 कोटी रुपयांचे नुकसान झाल्याचा दावा त्यांनी केला.

कापूस, सोयाबीन आणि मका या प्रमुख खरीप पिकांचा विचार करता नुकसान मोठ्या प्रमाणात असल्याचे रोहित पवार यांनी सांगितले. याशिवाय फळबागांचे नुकसान अद्याप या आकडेवारीत समाविष्ट करण्यात आलेले नसल्याचा त्यांचा दावा आहे.

ही आकडेवारी केवळ खरीप हंगामातील नुकसानीची असून, रब्बी हंगामातील नुकसानीचे अद्याप पूर्ण मूल्यमापन झालेले नाही, असा आरोपही रोहित पवार यांनी केला.

सरकारने दुष्काळ जाहीर केल्यानंतर शेतकऱ्यांना प्रत्यक्ष मदत कधी मिळणार, नुकसानभरपाई किती मिळणार आणि नुकसानीचे सर्वेक्षण कितपत अचूक झाले आहे, याकडे आता शेतकऱ्यांचे लक्ष लागले आहे. दरम्यान, रोहित पवारांच्या आरोपांवर सत्ताधारी नेते काय प्रत्युत्तर देतात, हे पाहणे महत्त्वाचे ठरणार आहे.