जळगाव । जळगाव तालुक्यातील धानवड गावातून एक संतापजनक घटना समोर आली आहे. १७ वर्षीय अल्पवयीन मुलीशी तिचे वय माहित असतानाही जबरदस्तीने विवाह लावून तिला गर्भवती केल्याचा धक्कादायक प्रकार उघडकीस आला आहे. या प्रकरणी जळगाव एमआयडीसी पोलीस ठाण्यात नराधम पतीविरुद्ध पोक्सो आणि बालविवाह प्रतिबंधक कायद्यान्वये गुन्हा दाखल करण्यात आला असून, पोलीस त्याचा शोध घेत आहेत. भूषण अशोक मोरे (रा. धानवड, ता. जि. जळगाव) असे गुन्हा दाखल झालेल्या संशयित आरोपीचे नाव आहे.
पीडित १७ वर्षीय मुलीच्या आईने दिलेल्या तक्रारीनुसार, आरोपी भूषण मोरे याने मुलगी कायद्याने अल्पवयीन असल्याचे पूर्णपणे माहीत असतानाही तिच्यासोबत बळजबरीने विवाह केला. लग्नानंतर आरोपीने तिला राहत्या घरी डांबून ठेवत पती-पत्नीसारखे राहण्यास भाग पाडले. तसेच तिच्या मनाविरुद्ध वारंवार शारीरिक संबंध प्रस्थापित केले. या पाशवी अत्याचारातून अल्पवयीन मुलगी गर्भवती राहिल्याचे समोर आल्यानंतर हा संपूर्ण प्रकार उघडकीस आला.
‘झिरो’ने वर्ग झाला गुन्हा
सुरुवातीला हा प्रकार जालना जिल्ह्यातील बदनापूर पोलीस ठाण्यात समोर आला होता. तिथून सदर प्रकरण ‘झिरो’ने वर्ग होऊन जळगाव एमआयडीसी पोलीस ठाण्यात प्राप्त झाले. त्यानुसार, पोलिसांनी तातडीने कारवाई करत आरोपी भूषण मोरे याच्याविरुद्ध भारतीय न्याय संहितेच्या (BNS) कलम ६४(२)(M), बाललैंगिक अत्याचार प्रतिबंधक कायदा (पोक्सो) कलम ४, ६ आणि बालविवाह प्रतिबंधक कायदा कलम ६, ९ अन्वये गुन्हा (गु.रं.नं. ७६२/२०२६) दाखल केला आहे.
उपविभागीय पोलीस अधिकारी नितीन गणापुरे यांच्या मार्गदर्शनाखाली महिला पोलीस उपनिरीक्षक राजश्री पाटील या प्रकरणाचा पुढील तपास करत असून, फरार असलेल्या नराधम आरोपीचा कसून शोध घेतला जात आहे. अल्पवयीन मुलींवरील अत्याचाराच्या या वाढत्या घटनांमुळे परिसरात तीव्र संताप व्यक्त होत आहे.
Discussion about this post