नागपूर । इथेनॉल मिश्रित इंधन (E20) धोरणाविरोधात युवक काँग्रेसने नागपुरात केंद्रीय मंत्री नितीन गडकरी यांच्या निवासस्थानाबाहेर जोरदार आंदोलन केले. गडकरी यांच्या राजीनाम्याची मागणी करत कार्यकर्त्यांनी घोषणाबाजी केली. पोलिसांनी आंदोलकांना निवासस्थानाकडे जाण्यापासून रोखत अनेक कार्यकर्त्यांना ताब्यात घेतले.
मागील काही दिवसांपासून E20 इथेनॉल मिश्रित पेट्रोलच्या मुद्द्यावर देशभरात चर्चा सुरू असून, सोशल मीडियावरही या धोरणावर टीका होत आहे. याच पार्श्वभूमीवर नागपूर युवक काँग्रेसने जनआक्रोश मोर्चाचे आयोजन केले.
दुपारी एक वाजता चिटणीस पार्क चौकातून मोर्चाला सुरुवात झाली. त्यानंतर मोठ्या संख्येने कार्यकर्ते नितीन गडकरी यांच्या निवासस्थानाकडे निघाले. आंदोलनाची माहिती मिळताच पोलिसांनी परिसरात मोठा बंदोबस्त तैनात केला होता. निवासस्थानाजवळ पोहोचण्याचा प्रयत्न करणाऱ्या कार्यकर्त्यांना पोलिसांनी बॅरिकेड्स लावून अडवले.
यावेळी काही आंदोलक बॅरिकेड्सवर चढल्याने काही काळ तणावाचे वातावरण निर्माण झाले. पोलिसांनी तातडीने हस्तक्षेप करत अनेक आंदोलकांना ताब्यात घेतले आणि परिस्थिती नियंत्रणात आणली.
आंदोलनादरम्यान युवक काँग्रेसच्या पदाधिकाऱ्यांनी इथेनॉल मिश्रित इंधन धोरणामुळे सर्वसामान्य वाहनधारकांचे नुकसान होत असल्याचा आरोप केला. या धोरणाची सखोल चौकशी करून केंद्रीय मंत्री नितीन गडकरी यांनी नैतिक जबाबदारी स्वीकारत राजीनामा द्यावा, अशी मागणी आंदोलकांनी केली.
दरम्यान, आंदोलनामुळे काही काळ परिसरात तणावाचे वातावरण निर्माण झाले असले तरी पोलिसांनी परिस्थिती नियंत्रणात ठेवत कोणताही अनुचित प्रकार घडू दिला नाही.
Discussion about this post