जळगाव । जळगाव महानगरपालिकेचा प्रशासकीय गाडा रुळावर आणण्यासाठी राज्य शासनाने अखेर मोठा निर्णय घेतला आहे. मनपाचे विद्यमान आयुक्त ज्ञानेश्वर ढेरे यांची तडकाफडकी बदली करण्यात आली असून, त्यांच्या जागी २०२१ बॅचचे तरुण आयएएस (IAS) अधिकारी आदित्य जीवने यांची जळगाव मनपाच्या नवीन आयुक्तपदी नियुक्ती करण्यात आली आहे. या संदर्भातील अधिकृत आदेश राज्य शासनातर्फे जारी करण्यात आले.
आदित्य जीवने हे सध्या छत्रपती संभाजीनगर येथे महावितरणमध्ये संयुक्त संचालक म्हणून कार्यरत आहेत. तरुण, अभ्यासू आणि गतिमान अधिकारी अशी त्यांची ओळख असून, त्यांच्या नियुक्तीमुळे जळगाव महापालिकेच्या प्रशासनाला नवी दिशा मिळण्याची अपेक्षा व्यक्त केली जात आहे.
दरम्यान, मावळते आयुक्त ज्ञानेश्वर ढेरे यांच्या कार्यपद्धतीवर आणि संथ प्रशासकीय गतीवर जळगाव मनपाच्या पदाधिकाऱ्यांसह लोकप्रतिनिधींकडून सातत्याने तीव्र आक्षेप घेतले जात होते. महापालिकेचा गाडा हाकताना विकासकामे रेंगाळली असल्याचा आरोप होत होता. या पार्श्वभूमीवर, महिनाभरापूर्वीच मुख्यमंत्र्यांकडे ढेरे यांच्या बदलीची थेट तक्रार करण्यात आली होती.
जळगाव शहराच्या रखडलेल्या विकासकामांना गती देण्यासाठी आणि मनपाचा कारभार गतिमान करण्यासाठी जळगावला पूर्णवेळ आयएएस दर्जाचा अधिकारी मिळावा, अशी आग्रही मागणी लोकप्रतिनिधींनी लावून धरली होती. याच अनुषंगाने जळगावच्या महापौर दीपमाला काळे यांनी मुंबईत मुख्यमंत्री देवेंद्र फडणवीस यांची प्रत्यक्ष भेट घेऊन लेखी व तोंडी तक्रार केली होती. यांनतर मुख्यमंत्र्यांनी अखेर जळगावला तरुण आयएएस अधिकारी दिला आहे.
दरम्यान, जळगावमधून बदली झालेले मावळते आयुक्त ज्ञानेश्वर ढेरे यांच्या नवीन नियुक्तीचे आदेश मंगळवारी सायंकाळी उशिरापर्यंत प्राप्त झालेले नव्हते. ढेरे यांची बदली निश्चित झाली असली तरी त्यांची पुढील नियुक्ती नेमकी कुठे करण्यात आली आहे, याबाबत अद्याप अधिकृत माहिती समोर आलेली नाही.
Discussion about this post