मुंबई : राज्यातील राजकीय घडामोडींना पुन्हा वेग आला असून, शिवसेनेचे नेते व उपमुख्यमंत्री एकनाथ शिंदे यांच्या नेतृत्वाला आणखी बळ मिळाले आहे. अमरावती विभागाचे शिक्षक आमदार किरण सरनाईक यांनी अधिकृतपणे शिंदे यांच्या शिवसेनेला पाठिंबा जाहीर केला आहे. त्यामुळे विधानपरिषदेत शिंदे गटाची ताकद आणखी वाढल्याचे मानले जात आहे.
अलीकडच्या काळात ठाकरे गटाला सलग धक्के बसताना दिसत आहेत. काही दिवसांपूर्वी सहा खासदारांनी शिंदे यांच्या नेतृत्वाखालील शिवसेनेत प्रवेश केला. त्यानंतर विधानपरिषदेचे आमदार सचिन अहिर यांनीही शिंदे गटाची वाट धरली. आता शिक्षक आमदार किरण सरनाईक यांनीही पाठिंबा जाहीर केल्याने राज्यातील राजकीय समीकरणांमध्ये नव्या चर्चांना उधाण आले आहे.
यावेळी माध्यमांशी संवाद साधताना उपमुख्यमंत्री एकनाथ शिंदे यांनी किरण सरनाईक यांचे स्वागत केले. ते म्हणाले, “गेल्या काही दिवसांत अनेक लोकप्रतिनिधींनी शिवसेनेवर विश्वास व्यक्त केला आहे. सहा खासदार, त्यानंतर आमदार सचिन अहिर आणि आता शिक्षक आमदार किरण सरनाईक यांनीही आमच्यासोबत काम करण्याचा निर्णय घेतला आहे. सहयोगी सदस्य म्हणून ते शिवसेनेसोबत काम करतील. त्यांच्या निर्णयाचे मी मनापासून स्वागत करतो.”
दरम्यान, शिक्षक आमदार किरण सरनाईक यांनीही आपली भूमिका स्पष्ट करत शिंदे यांच्या नेतृत्वावर विश्वास व्यक्त केला. “उपमुख्यमंत्री एकनाथ शिंदे यांनी मला विश्वास दिला असून भविष्यातही सहकार्य करण्याचे आश्वासन दिले आहे. त्यांच्या नेतृत्वाखाली काम करण्याचा निर्णय घेतला असून त्याबद्दल मी त्यांचे आभार मानतो. तसेच माझ्यावर विश्वास दाखविणाऱ्या शिक्षक बांधवांचेही आभार व्यक्त करतो,” असे सरनाईक यांनी सांगितले.
किरण सरनाईक यांच्या पाठिंब्यामुळे विधानपरिषदेत शिंदे गटाचे संख्याबळ वाढले असून, आगामी काळात राज्यातील राजकीय घडामोडींवर त्याचा परिणाम होण्याची शक्यता व्यक्त केली जात आहे.
Discussion about this post