सरकारी नोकरीच्या तयारीत असलेल्या अभियांत्रिकी पदवीधरांसाठी कर्मचारी निवड आयोगाने (SSC) मोठी संधी उपलब्ध करून दिली आहे. आयोगाने कनिष्ठ अभियंता (Junior Engineer) पदांच्या भरतीसाठी अधिकृत अधिसूचना जारी केली असून, या भरतीद्वारे सिव्हिल, इलेक्ट्रिकल आणि मेकॅनिकल अभियांत्रिकी शाखेतील एकूण १,७४८ पदे भरली जाणार आहेत.
पात्र उमेदवारांना २ सप्टेंबर २०२६ पासून ऑनलाइन अर्ज करता येणार असून अर्जाची अंतिम मुदत २२ सप्टेंबर २०२६ आहे. उमेदवारांनी आयोगाच्या अधिकृत संकेतस्थळावर अर्ज प्रक्रिया पूर्ण करावी.
महत्त्वाच्या तारखा
अर्ज सुरू: २ सप्टेंबर २०२६
अर्जाची अंतिम मुदत: २२ सप्टेंबर २०२६
ऑनलाइन शुल्क भरण्याची अंतिम मुदत: २३ सप्टेंबर २०२६ रात्री ११ वाजेपर्यंत
अर्ज दुरुस्तीची मुदत: २८ ते ३० सप्टेंबर २०२६
संगणक आधारित परीक्षा: ऑक्टोबर/नोव्हेंबर २०२६
कोण अर्ज करू शकतो?
उमेदवाराकडे मान्यताप्राप्त विद्यापीठ किंवा संस्थेतून संबंधित अभियांत्रिकी शाखेतील बी.ई., बी.टेक. किंवा तीन वर्षांचा अभियांत्रिकी डिप्लोमा असणे आवश्यक आहे. संबंधित पदानुसार सिव्हिल, इलेक्ट्रिकल किंवा मेकॅनिकल शाखेतील पात्रता ग्राह्य धरली जाईल.
वयोमर्यादा किती?
उमेदवारांचे किमान वय १८ वर्षे असावे. संबंधित पदानुसार कमाल वयोमर्यादा ३० ते ३२ वर्षांपर्यंत आहे. SC, ST, OBC आणि PwD यांसह आरक्षित प्रवर्गातील उमेदवारांना केंद्र सरकारच्या नियमानुसार वयोमर्यादेत सवलत मिळणार आहे.
कशी होणार निवड?
उमेदवारांची निवड पेपर-१ आणि पेपर-२ या परीक्षांच्या आधारे केली जाईल. पेपर-१ मध्ये पात्र ठरणाऱ्या उमेदवारांना पेपर-२ साठी संधी मिळेल. परीक्षेत चुकीच्या उत्तरासाठी एक-तृतीयांश नकारात्मक गुणांकन लागू असेल.
किती मिळणार पगार?
निवड झालेल्या उमेदवारांना गट-ब अराजपत्रित, वेतन स्तर-६ अंतर्गत ₹३५,४०० ते ₹१,१२,४०० वेतनश्रेणी मिळणार आहे.
अर्ज शुल्क
सर्वसाधारण आणि OBC प्रवर्गातील उमेदवारांसाठी ₹१०० अर्ज शुल्क आहे. तर SC, ST, PwD आणि सर्व प्रवर्गातील महिला उमेदवारांना अर्ज शुल्कातून सूट देण्यात आली आहे.
Discussion about this post