सोनम वांगचुक यांच्या उपचारांवरून वाद; पत्नीची दिल्ली हायकोर्टात धाव

नवी दिल्ली : सामाजिक कार्यकर्ते सोनम वांगचुक यांच्या आरोग्यस्थितीबाबत आणि त्यांच्यावर सुरू असलेल्या उपचारांबाबत नवीन वाद निर्माण झाला आहे. वांगचुक यांच्या पत्नी गीतांजली जे. आंग्मो यांनी सफदरजंग रुग्णालयाच्या कार्यपद्धतीवर गंभीर प्रश्न उपस्थित करत पतीला खासगी रुग्णालयात हलविण्याची परवानगी मिळावी यासाठी दिल्ली उच्च न्यायालयाचे दार ठोठावले आहे.

सोशल मीडियावर प्रसिद्ध केलेल्या निवेदनात आंग्मो यांनी सफदरजंग रुग्णालयाने दिलेल्या वैद्यकीय माहितीत विसंगती असल्याचा आरोप केला आहे. त्यांच्या म्हणण्यानुसार, रुग्णालयाने सोनम वांगचुक यांच्या रक्तातील पोटॅशियमचे प्रमाण २.९ असल्याचे सांगितले होते आणि ही स्थिती धोकादायक असल्याचेही नमूद केले होते. मात्र, अधिकृत आरोग्य बुलेटिनमध्ये हा आकडा न देता केवळ पोटॅशियमची पातळी कमी असल्याचे नमूद करण्यात आल्याचे त्यांनी म्हटले आहे

आंग्मो यांनी असा दावा केला की, वारंवार पाठपुरावा केल्यानंतर सुमारे दहा तासांनी स्वतंत्र प्रयोगशाळेत रक्त तपासणीची परवानगी मिळाली. या तपासणीत पोटॅशियमचे प्रमाण ३.५ आढळून आले, जे सामान्य मर्यादेत असल्याचे त्यांनी सांगितले.

I have lost faith in Safdarjung Government Hospital.
The hospital told us @Wangchuk66’s potassium had dropped to 2.9, describing it as alarming and life-threatening. Yet, in its public health bulletin, it conveniently omitted the actual number, referring only to "decreasing…

— Gitanjali J Angmo (@GitanjaliAngmo) July 19, 2026

याशिवाय, सोनम वांगचुक यांना रुग्णालयातून डिस्चार्ज देण्यास किंवा त्यांच्या पसंतीच्या खासगी रुग्णालयात हलविण्यास प्रशासनाकडून परवानगी दिली जात नसल्याचा आरोपही त्यांनी केला आहे. रुग्णालय परिसरात मोठ्या प्रमाणात पोलीस बंदोबस्त ठेवण्यात आल्याचे सांगत, ही परिस्थिती वैद्यकीय उपचारांपेक्षा नजरकैदेसारखी असल्याची टीकाही त्यांनी केली.

“सोनम वांगचुक यांच्या प्रकृतीबाबत कोणतीही प्रतिकूल घटना घडल्यास त्याची जबाबदारी संबंधित प्रशासन आणि रुग्णालय व्यवस्थापनाची असेल,” असे आंग्मो यांनी आपल्या निवेदनात म्हटले आहे.

या सर्व घडामोडींमुळे त्यांनी दिल्ली उच्च न्यायालयात तातडीची याचिका दाखल केली असून, वांगचुक यांना खासगी रुग्णालयात उपचारासाठी हलविण्याची परवानगी देण्याची मागणी केली आहे. दरम्यान, या आरोपांवर सफदरजंग रुग्णालय किंवा दिल्ली प्रशासनाकडून अद्याप कोणतेही अधिकृत स्पष्टीकरण देण्यात आलेले नाही.