शिरपूर (धुळे): पत्नीसमोर आई-वडिलांनी अपमानास्पद बोलल्याचा राग मनात धरून एका नराधम मुलाने पोटच्या जन्मदात्यांची मुसळीने डोक्यात प्रहार करून निर्घृण हत्या केल्याची धक्कादायक घटना घडली आहे. धुळे जिल्ह्यातील शिरपूर येथील महावीर सोसायटीमध्ये आज, शुक्रवारी (१५ मे २०२६) दुपारी दोन वाजेच्या सुमारास हे दुहेरी हत्याकांड घडले. या घटनेमुळे संपूर्ण शिरपूर तालुक्यात प्रचंड खळबळ उडाली असून नात्यांमधील क्रूरता पाहून सर्वजण सुन्न झाले आहेत.
मिळालेल्या माहितीनुसार, मृत आई-वडील हे आपल्या मुलीचा विवाह सोहळा आनंदाने आटोपून आजच घरी परतले होते. घरी आल्यानंतर काही कारणावरून आई-वडील आणि आरोपी मुलगा यांच्यात वाद झाला. या वादादरम्यान आई-वडिलांनी मुलाला त्याच्या पत्नीसमोर काहीतरी अपमानास्पद शब्द बोलले. हाच राग मुलाच्या डोक्यात गेला. रागाच्या भरात त्याने घरात असलेले लोखंडी/दगडी मुसळ उचलले आणि थेट आई व वडिलांच्या डोक्यात एकापाठोपाठ एक सपासप प्रहार केले. हा हल्ला इतका भीषण होता की, गंभीर दुखापत होऊन रक्ताच्या थारोळ्यात पडलेल्या दोघांचाही जागीच मृत्यू झाला.
आई-वडिलांचा खून केल्यानंतर आरोपी मुलगा घरातून पळ काढून घटनास्थळावरून फरार होण्याच्या तयारीत होता. मात्र, घरातील आरडाओरड आणि संशयास्पद हालचाली पाहून शेजारील सतर्क नागरिकांनी धाव घेतली. नागरिकांनी पळून जाणाऱ्या आरोपी मुलाला जागीच पकडून ठेवले आणि घटनेची माहिती तातडीने शिरपूर पोलिसांना दिली. माहिती मिळताच पोलिसांनी घटनास्थळी धाव घेत आरोपीला ताब्यात घेतले.
पोटच्या मुलानेच आई-वडिलांचा जीव घेतल्याने महावीर सोसायटीसह संपूर्ण परिसरात भीतीचे आणि तणावाचे वातावरण निर्माण झाले आहे. पोलिसांच्या सूत्रांनी दिलेल्या माहितीनुसार, जेव्हा आरोपी मुलाला पोलिसांनी बेड्या ठोकून ताब्यात घेतले, तेव्हा त्याच्या चेहऱ्यावर आपल्या आई-वडिलांची हत्या केल्याचा साधा पश्चातापाचा लवलेशही दिसून येत नव्हता, त्याचे हे रूप पाहून पोलीसही चक्रावून गेले. शिरपूर पोलिसांनी दोन्ही मृतदेह शवविच्छेदनासाठी पाठवले असून, याप्रकरणी गुन्हा दाखल करण्याची प्रक्रिया सुरू आहे.
Discussion about this post