संजय राऊतांचे थेट डोनाल्ड ट्रम्प यांना पत्र! बंगाल निकालावरून मोदींच्या अभिनंदनावर आक्षेप; विचारला जाब

मुंबई । पश्चिम बंगाल विधानसभा निवडणुकीच्या निकालावरून देशांतर्गत राजकारण तापले असतानाच, आता याचे आंतरराष्ट्रीय पडसाद उमटू लागले आहेत. शिवसेना ठाकरे गटाचे खासदार संजय राऊत यांनी थेट अमेरिकेचे राष्ट्राध्यक्ष डोनाल्ड ट्रम्प यांना एक पत्र पाठविले आहे. बंगालमधील भाजपच्या विजयावर ट्रम्प यांनी पंतप्रधान नरेंद्र मोदींचे अभिनंदन केल्याबद्दल राऊतांनी पत्रातून तीव्र आक्षेप नोंदवला असून, “बाहेरून दिलेली ही पावती घाईची आणि अवाजवी आहे,” असे खडे बोल सुनावले आहेत.

भारताचा एक खासदार या नात्याने मी हे पत्र लिहित आहे. पश्चिम बंगाल विधानसभा निवडणुकीच्या निकालावर आपण पंतप्रधान मोदींचे अभिनंदन केल्याचे समजले. त्याबद्दल मला काही गोष्टी मांडायच्या आहेत. ही निवडणूक एका राज्याची होती. हा भारताच्या लोकशाहीचा अंतर्गत प्रश्न आहे. अशा वेळी बाहेरून दिलेली पावती घाईची आणि चुकीची वाटते. या निवडणुकीत अनेक गंभीर तक्रारी समोर आल्या आहेत. लोकांमध्ये भीतीचं वातावरण होतं आणि त्यांच्यावर दबाव आणला गेल्याचे आरोप आहेत. निवडणूक आयोगाने निष्पक्ष काम न करता भाजपची बाजू घेतल्याची लोकांची भावना आहे. यामुळे यंत्रणेच्या विश्वासार्हतेवर प्रश्न उभे राहिले आहेत, असे संजय राऊत म्हणाले.

निवडणुकीच्या वेळी मोठ्या प्रमाणात तैनात केलेल्या केंद्रीय सुरक्षा दलांमुळे लोकांमध्ये सुरक्षिततेऐवजी दहशतीचं वातावरण निर्माण झाल्याचं बोललं जातंय. ममता बॅनर्जी यांच्यासह अनेक मोठ्या नेत्यांनी या निवडणूक प्रक्रियेवर शंका उपस्थित केल्या आहेत. लोकांच्या मनात असलेली ही अस्वस्थता दुर्लक्षित करून चालणार नाही, असेही राऊत म्हणाले.
URL

Dear President @realDonaldTrump

Greetings.

As a Member of Parliament from India, I write in response to reports of your congratulations to PM Narendra Modi on the West Bengal Assembly election results.

These are state-level elections—an internal matter of India’s federal…

— Sanjay Raut (@rautsanjay61) May 8, 2026

लोकशाही म्हणजे फक्त निवडणूक होणं नव्हे, तर ती पारदर्शक आणि निष्पक्ष असणं महत्त्वाचं आहे. प्रक्रियेवरच जेव्हा गंभीर आरोप होतात. तेव्हा त्याचं कौतुक करण्याऐवजी चौकशी होणं गरजेचं असतं. अभिनंदनपर विधान करण्यापूर्वी आपण या गोष्टींचा विचार केला होता का? आपण लोकशाही मानणारे आहात, त्यामुळे आपण या प्रकरणाकडे अधिक गांभीर्याने आणि संतुलितपणे पाहावे, अशी मी विनंती करतो, असे संजय राऊत म्हणाले.