मुंबई : महाराष्ट्र अंधश्रद्धा निर्मूलन समितीचे संस्थापक डॉ. नरेंद्र दाभोलकर यांच्या हत्या प्रकरणात मंगळवारी मोठी घडामोड घडली आहे. हत्या प्रकरणातील दोषी सचिन अंदुरेला मुंबई उच्च न्यायालयाने जामीन मंजूर केला आहे. तसेच विशेष न्यायालयाने सुनावलेल्या जन्मठेपेच्या शिक्षेलाही उच्च न्यायालयाने स्थगिती दिली आहे. न्यायमूर्ती सारंग कोतवाल आणि न्यायमूर्ती रणजितसिंह भोसले यांच्या खंडपीठासमोर या प्रकरणाची सुनावणी झाली. यावेळी न्यायालयाने सचिन अंदुरेच्या जामीन अर्जावर निर्णय देत त्याला दिलासा दिला.
डॉ. दाभोलकर हत्या प्रकरणात पुणे येथील विशेष न्यायालयाने १० मे २०२४ रोजी निकाल दिला होता. या निकालात सचिन अंदुरे आणि शरद कळसकर यांना हत्या प्रकरणात दोषी ठरवून जन्मठेपेची शिक्षा सुनावण्यात आली होती.या निर्णयाला सचिन अंदुरेने मुंबई उच्च न्यायालयात आव्हान दिले होते. त्याच्या वतीने अॅड. वीरेंद्र इचलकरंजीकर यांनी बाजू मांडली. अंतिम निर्णय होईपर्यंत जामीन देण्यासह जन्मठेपेच्या शिक्षेला स्थगिती देण्याची मागणी करण्यात आली होती.
‘ओळख परेड झाली नाही’ असा युक्तिवाद
अंदुरेच्या वतीने युक्तिवाद करताना सीबीआयकडून त्याची ओळख पटवण्यासाठी ओळख परेड घेण्यात आली नसल्याचा मुद्दा मांडण्यात आला. तसेच काही साक्षीदारांच्या जबाबांमध्ये विसंगती असल्याचा दावा करण्यात आला.काही साक्षीदारांनी अंदुरेनेच डॉ. दाभोलकर यांच्यावर गोळीबार केल्याचे सांगितले, तर काही साक्षीदारांच्या जबाबांमध्ये घटनास्थळी प्रत्यक्ष पाहिल्याबाबत वेगवेगळे दावे असल्याचे बचाव पक्षाने न्यायालयाच्या निदर्शनास आणून दिले.
दरम्यान, या प्रकरणातील सहआरोपी शरद कळसकर यालाही यापूर्वीच जामीन मंजूर झाला आहे.
Discussion about this post