नवी दिल्ली : भाजपला मोठा धक्का बसला असून बड्या नेत्यानं पक्षाचा राजीनामा दिला आहे. भाजपचे राष्ट्रीय प्रवक्ते शहजाद पूनावाला यांनी पक्षाला सोडचिठ्ठी दिली आहे. पूनावाला यांनी भाजपच्या सदस्यत्वासह राष्ट्रीय प्रवक्तेपदाचाही राजीनामा देत असल्याची घोषणा केली आहे. त्यांनी भाजपचे राष्ट्रीय अध्यक्ष नितीन नबीन यांना पत्र लिहून आपला राजीनामा स्वीकारण्याची विनंती केली आहे.
शहजाद पूनावाला भाजप सोडणार असल्याची चर्चा गेल्या काही दिवसांपासून राजकीय वर्तुळात सुरू होती. मात्र, त्यांनी याबाबत अधिकृत घोषणा केली नव्हती. अखेर सोमवारी त्यांनी सोशल मीडिया प्लॅटफॉर्म ‘एक्स’वर आपले राजीनामा पत्र पोस्ट करत पक्ष सोडत असल्याचे स्पष्ट केले.
पूनावाला यांनी आपल्या पत्रात ३० जुलै २०२६ रोजी लिहिलेल्या पत्राचा संदर्भ दिला आहे. त्या पत्रात त्यांनी वैयक्तिक आणि आर्थिक कारणांमुळे पक्षाचा राजीनामा देण्याची तयारी दर्शवली होती. मात्र, पक्षाने त्यांचा राजीनामा त्यावेळी स्वीकारला नाही आणि त्यांना निर्णयाचा पुनर्विचार करण्यासाठी वेळ दिला. हा क्षण आपल्यासाठी अत्यंत भावुक करणारा होता, असे पूनावाला यांनी पत्रात नमूद केले आहे.
‘पक्ष सोडतोय, विचारधारा नाही’
पूनावाला यांनी पुढे म्हटले आहे की, आपण आता बराच विचार केला असून भाजपच्या सदस्यत्वाचा तसेच राष्ट्रीय प्रवक्तेपदाचा राजीनामा देण्याचा अंतिम निर्णय घेतला आहे. आपण पक्ष सोडत असलो तरी भाजपची विचारधारा कधीही सोडणार नाही, असेही त्यांनी स्पष्ट केले आहे.
गेल्या काही दिवसांत घडलेल्या काही घटना आणि काही व्यक्तींविषयी आपण पक्ष नेतृत्वाला सविस्तर माहिती दिली होती. त्याच घटनांमुळे आपल्या निर्णयावर ठाम राहण्यास भाग पाडले गेले, असेही पूनावाला यांनी पत्रात म्हटले आहे.
दरम्यान, राजीनामा देताना शहजाद पूनावाला यांनी पंतप्रधान नरेंद्र मोदी, केंद्रीय गृहमंत्री अमित शाह आणि भाजपचे राष्ट्रीय अध्यक्ष नितीन नबीन यांचे आभार मानले आहेत. त्यांच्या राजीनाम्यामुळे भाजपच्या राजकीय वर्तुळात चर्चेला उधाण आले आहे.
Discussion about this post