भुसावळ । उत्तर भारताकडे प्रवास करणाऱ्या प्रवाशांसाठी मध्य रेल्वेने एक अत्यंत महत्त्वपूर्ण निर्णय घेतला आहे. या अंतर्गत दादर–गोरखपूर आणि दादर–बलिया मार्गावर धावणाऱ्या विशेष रेल्वेगाड्या आता नियमित मेल/एक्स्प्रेस म्हणून धावणार आहेत. या गाड्यांना भुसावळ स्थानकावर थांबा असल्याने खानदेश आणि मुंबईच्या दिशेने प्रवास करणाऱ्या प्रवाशांची मोठी सोय होणार आहे.
दादर–गोरखपूर मार्गावरील विशेष गाडी क्रमांक ०१०२७ आता ११०४७ दादर–गोरखपूर एक्स्प्रेस म्हणून धावणार आहे. ही सेवा १८ ऑगस्टपासून सुरू होईल. दादरहून ही गाडी दर मंगळवारी, गुरुवारी, शनिवारी आणि रविवारी म्हणजे आठवड्यातून चार दिवस धावेल. दादरहून गाडी दुपारी २ वाजून ५ मिनिटांनी सुटेल आणि तिसऱ्या दिवशी पहाटे २ वाजून ५५ मिनिटांनी गोरखपूरला पोहोचेल.
गोरखपूर–दादर मार्गावरील विशेष गाडी क्रमांक ०१०२८ आता ११०४८ गोरखपूर–दादर एक्स्प्रेस म्हणून धावणार आहे. ही सेवा २० ऑगस्टपासून नियमित होईल. गोरखपूरहून ही गाडी दर सोमवार, मंगळवार, गुरुवार आणि शनिवार धावेल. गोरखपूरहून दुपारी २ वाजून २० मिनिटांनी सुटणारी गाडी तिसऱ्या दिवशी पहाटे ३ वाजून ३५ मिनिटांनी दादरला पोहोचेल. मार्गावरील प्रमुख थांब्यांमध्ये कल्याण, नाशिक रोड, भुसावळ, हरदा, इटारसी, राणी कमलापती, बीना, ललितपूर, टीकमगड, छतरपूर, खजुराहो, महोबा, बांदा, चित्रकूट, माणिकपूर, प्रयागराज, ज्ञानपूर रोड आणि बनारस यांचा समावेश आहे.
दादर–बलिया मार्गावरील विशेष गाडी क्रमांक ०१०२५ चे रूपांतर ११०४३ दादर-बलिया एक्स्प्रेसमध्ये करण्यात आले आहे. ही गाडी १७ ऑगस्टपासून नियमित स्वरूपात धावणार आहे. दादरहून ही सेवा दर सोमवार, बुधवार आणि शुक्रवार, म्हणजे आठवड्यातून तीन दिवस उपलब्ध असेल. दादरहून दुपारी २ वाजून ५ मिनिटांनी सुटणारी गाडी तिसऱ्या दिवशी पहाटे १ वाजून ४५ मिनिटांनी बलियाला पोहोचेल.
बलिया-दादर मार्गावरील विशेष गाडी क्रमांक ०१०२६ चे रूपांतर ११०४४ बलिया-दादर एक्स्प्रेसमध्ये करण्यात आले आहे. ही सेवा १९ ऑगस्टपासून नियमित होणार आहे. बलियाहून गाडी दर बुधवार, शुक्रवार आणि रविवार धावेल. बलियाहून दुपारी ३ वाजून १५ मिनिटांनी सुटणारी ही गाडी तिसऱ्या दिवशी पहाटे ३ वाजून ३५ मिनिटांनी दादरला पोहोचेल. कल्याण, नाशिक रोड, भुसावळ, हरदा, इटारसी, राणी कमलापती, बीना, ललितपूर, टीकमगड, छतरपूर, खजुराहो, महोबा, बांदा, चित्रकूट, माणिकपूर, प्रयागराज, ज्ञानपूर रोड आणि बनारस यांसह विविध स्थानकांवर थांबे देण्यात आले आहेत.
Discussion about this post