ज्ञानेश कुमारांच्या अडचणी वाढल्या; २० वर्षे जुन्या प्रकरणाची पुन्हा चौकशी, राज्य सरकारचे आदेश

देशाचे मुख्य निवडणूक आयुक्त (CEC) ज्ञानेश कुमार सध्या निवडणूक प्रक्रियेवरील वादाच्या पार्श्वभूमीवर चर्चेत असतानाच त्यांच्या अडचणीत आणखी भर पडली आहे. केरळ सरकारने ज्ञानेश कुमार यांच्याशी संबंधित २००६ मधील जुन्या प्रकरणाची पुन्हा दक्षता चौकशी करण्याचे आदेश दिले आहेत. केरळचे गृहमंत्री रमेश चेन्नीथला यांनी दक्षता व भ्रष्टाचार प्रतिबंधक विभागाला (VACB) या प्रकरणाची सखोल चौकशी करण्याचे निर्देश दिले आहेत.

हे प्रकरण ज्ञानेश कुमार केरळच्या सार्वजनिक बांधकाम विभागाचे (PWD) सचिव असताना घडलेल्या कथित अनियमिततेशी संबंधित आहे. २००६ मध्ये केरळ राज्य परिवहन प्रकल्पांतर्गत (KSTP) एमसी रोडच्या विकासाचे काम PATI-BEL या इंडो-मलेशियन कन्सोर्टियमकडे होते. या प्रकल्पाशी संबंधित मलेशियन अभियंता ली सी बीन यांनी आत्महत्या केली होती. त्यांच्या आत्महत्येच्या प्रकरणात ज्ञानेश कुमार यांच्या नावाचा उल्लेख असल्याचे वृत्त आहे.

कंत्राटांमध्ये अनियमिततेचे आरोप

या प्रकरणात ज्ञानेश कुमार यांच्यावर सार्वजनिक बांधकाम विभागाचे सचिव म्हणून कार्यरत असताना कंत्राटे देताना कथित आर्थिक अनियमितता आणि गैरवर्तन केल्याचे आरोप करण्यात आले आहेत. या आरोपांनंतर त्यावेळी दक्षता विभागाकडून प्राथमिक चौकशीही करण्यात आली होती.

मात्र, तक्रारदार मलयनकिझू वेणुगोपाल यांनी नव्याने केलेल्या तक्रारीत या प्राथमिक चौकशीवरच प्रश्न उपस्थित केले आहेत. त्यांच्या म्हणण्यानुसार, तत्कालीन चौकशीवर बाह्य दबावाचा प्रभाव होता आणि कोणताही ठोस निष्कर्ष न काढता ती बंद करण्यात आली. त्यामुळे या प्रकरणाची पुन्हा सखोल चौकशी करण्यात यावी, अशी मागणी त्यांनी केली होती.

२००६ मध्येच झाली होती बदली

या आरोपांनंतर २००६ मध्ये ज्ञानेश कुमार यांची सार्वजनिक बांधकाम विभागाच्या सचिवपदावरून बदली करण्यात आली होती. त्यानंतर प्रकरणाची प्राथमिक चौकशी झाली; मात्र पुढील कारवाई झाली नसल्याचे उपलब्ध वृत्तांमध्ये नमूद करण्यात आले आहे. आता नव्या तक्रारीच्या पार्श्वभूमीवर केरळ सरकारने या प्रकरणातील जुने रेकॉर्ड आणि चौकशीची प्रक्रिया पुन्हा तपासण्याचे निर्देश दिले आहेत.

दरम्यान, ज्ञानेश कुमार यांच्या विरोधात निवडणूक प्रक्रियेशी संबंधित मुद्द्यांवरून देशभरात आंदोलन सुरू असतानाच केरळ सरकारच्या या निर्णयामुळे २० वर्षांपूर्वीचे हे प्रकरण पुन्हा चर्चेत आले आहे. मात्र, ज्ञानेश कुमार यांच्यावरील आरोपांची सत्यता अद्याप चौकशीअंतीच स्पष्ट होणार असून, सध्या हे आरोप तपासाच्या टप्प्यात आहेत.