मुंबई : विधान परिषदेच्या निवडणुकीत अजित पवार यांच्या राष्ट्रवादी काँग्रेस पक्षाला अपेक्षित यश मिळाले नसल्याने पक्षांतर्गत नाराजी उघडपणे समोर येऊ लागली आहे. पक्षातील काही नेत्यांनीच नेतृत्वाच्या कार्यपद्धतीवर प्रश्नचिन्ह उपस्थित करत आत्मचिंतनाचा सल्ला दिला आहे. या पार्श्वभूमीवर राष्ट्रवादी काँग्रेसच्या काही बड्या नेत्यांनी दिल्लीत जाऊन केंद्रीय गृहमंत्री आणि भाजपचे ज्येष्ठ नेते अमित शाह यांची भेट घेतल्याने राजकीय वर्तुळात खळबळ उडाली आहे.
विशेष म्हणजे, या भेटीवेळी राष्ट्रवादी काँग्रेसच्या अध्यक्षा आणि उपमुख्यमंत्री सुनेत्रा पवार तसेच पार्थ पवार उपस्थित नव्हते. या दोघांच्या अनुपस्थितीत झालेल्या भेटीचा फोटो सोशल मीडियावर व्हायरल झाल्यानंतर राष्ट्रवादीच्या राजकीय भूमिकेबाबत विविध तर्कवितर्क लढवले जात आहेत.
विधान परिषदेच्या निवडणुकीत राष्ट्रवादी काँग्रेसला मोठ्या अपयशाचा सामना करावा लागला. या निकालानंतर पक्षातील नेत्यांकडूनच नेतृत्वाच्या कामकाजाबाबत नाराजी व्यक्त केली जात आहे. पक्षाने आगामी काळात आत्मपरीक्षण करण्याची गरज असल्याचे मतही काही नेत्यांनी मांडले आहे. त्यामुळे पक्षात सर्व काही आलबेल नसल्याची चर्चा राजकीय वर्तुळात सुरू झाली आहे.
अमित शाहांच्या भेटीने चर्चांना उधाण
एकीकडे पक्षातील अंतर्गत नाराजीची चर्चा सुरू असतानाच राष्ट्रवादीच्या महत्त्वाच्या नेत्यांनी अमित शाह यांची दिल्लीत भेट घेतली. या भेटीत नेमकी कोणत्या विषयावर चर्चा झाली, याबाबत अधिकृत माहिती समोर आलेली नाही. मात्र, सुनेत्रा पवार आणि पार्थ पवार यांच्या अनुपस्थितीमुळे या भेटीला राजकीय महत्त्व प्राप्त झाले आहे.
राष्ट्रवादीत नव्या राजकीय समीकरणांची चर्चा?
अमित शाहांच्या भेटीचा फोटो व्हायरल झाल्यानंतर महाराष्ट्राच्या राजकारणात आगामी काळात काही मोठ्या घडामोडी घडणार का, असा प्रश्न उपस्थित केला जात आहे. विधान परिषद निवडणुकीतील अपयश, पक्षांतर्गत नाराजी आणि आता भाजपच्या वरिष्ठ नेतृत्वासोबत झालेली भेट, या सर्व घडामोडी एकाच वेळी समोर आल्याने राष्ट्रवादीच्या भविष्यातील राजकीय वाटचालीबाबत उत्सुकता वाढली आहे.
दरम्यान, या भेटीमागे नेमके काय राजकीय गणित आहे आणि त्याचा राष्ट्रवादी काँग्रेसच्या अंतर्गत राजकारणावर काय परिणाम होणार, हे आगामी काळात स्पष्ट होईल.
Discussion about this post