मुंबई : केंद्रीय गृहमंत्री अमित शहा यांच्यासोबत अजित पवार गटाच्या नेत्यांची दिल्लीत झालेली भेट सध्या राज्याच्या राजकारणात चर्चेचा विषय ठरली आहे. या भेटीनंतर राष्ट्रवादी काँग्रेसमध्ये बैठकांचे सत्र सुरू झाले असून, मंत्रिमंडळातील संभाव्य बदलांबाबतही राजकीय वर्तुळात चर्चा रंगू लागली आहे. त्यातच माजी मंत्री अनिल पाटील यांना तातडीने मुंबईत येण्याचा निरोप देण्यात आल्याने त्यांच्या मंत्रिमंडळातील पुनरागमनाच्या चर्चांना बळ मिळाले आहे.
दिल्लीत अमित शहा यांची भेट घेतल्यानंतर राष्ट्रवादी काँग्रेसच्या हालचाली वाढल्या आहेत. मंत्री छगन भुजबळ यांच्या निवासस्थानी पक्षातील प्रमुख नेत्यांची बैठक पार पडत आहे. या बैठकीला छगन भुजबळ, प्रफुल्ल पटेल, सुनील तटकरे आणि हसन मुश्रीफ उपस्थित आहेत. या बैठकीनंतर पक्षाच्या कोअर कमिटीची बैठक होणार असल्याने त्यामध्ये कोणत्या विषयांवर चर्चा होते, याकडे सर्वांचे लक्ष लागले आहे.
याचदरम्यान माजी मंत्री अनिल पाटील यांना मुंबईत तातडीने बोलावण्यात आले. निरोप मिळताच ते मुंबईच्या दिशेने रवाना झाले. त्यामुळे अजित पवार गटात मंत्रिमंडळाच्या संभाव्य फेरबदलाची तयारी सुरू आहे का आणि त्यात अनिल पाटील यांना पुन्हा संधी मिळणार का, याबाबत राजकीय चर्चांना उधाण आले आहे.
मात्र, मुंबईला रवाना होण्यापूर्वी अनिल पाटील यांनी या चर्चांवर सावध भूमिका घेतली. आपण जिल्हा बँकेच्या निवडणुकीसंदर्भात उपमुख्यमंत्री सुनेत्रा पवार आणि प्रदेशाध्यक्ष सुनील तटकरे यांची भेट घेण्यासाठी जात असल्याचे त्यांनी सांगितले. मंत्रिमंडळ फेरबदलाबाबत कोणतेही ठोस विधान करण्याचे त्यांनी टाळले.
मंत्रिमंडळातील संभाव्य बदलांवर भाष्य करताना त्यांनी अजित पवार यांनी यापूर्वी दिलेल्या आश्वासनाची आठवण करून दिली. अडीच वर्षांनंतर मंत्रिमंडळात फेरबदल करून नवीन चेहऱ्यांना संधी देण्याचा विचार अजितदादांनी व्यक्त केला होता. हा शब्द पूर्ण करायचा असल्यास त्याबाबतचा निर्णय राष्ट्रवादीच्या राष्ट्रीय अध्यक्ष सुनेत्रा पवार यांच्या नेतृत्वाखाली होऊ शकतो, असे पाटील यांनी म्हटले.
दरम्यान, जिल्हा बँकेच्या निवडणुकीसाठी महायुतीतील जागावाटपाचाही मुद्दा महत्त्वाचा ठरत आहे. राष्ट्रवादी काँग्रेसला सन्मानजनक जागा मिळाल्यास महायुतीसोबत निवडणूक लढवण्याची तयारी असल्याचे अनिल पाटील यांनी स्पष्ट केले. भाजप आणि शिवसेनेकडून याबाबत शब्द मिळाल्याचे सांगत त्यांनी जागावाटपावर चर्चा सुरू असल्याचेही नमूद केले.
राष्ट्रवादी काँग्रेसकडून जिल्हा बँकेच्या निवडणुकीत सात जागांची मागणी करण्यात आली आहे. अर्ज छाननीनंतर या विषयावर अंतिम चर्चा होणार असल्याचे पाटील यांनी सांगितले. सन्मानजनक जागा न मिळाल्यास पक्षाला स्वतंत्र निर्णय घ्यावा लागेल, असा इशाराही त्यांनी दिला.
एकीकडे जिल्हा बँकेच्या निवडणुकीचे समीकरण जुळवण्याचे प्रयत्न सुरू असताना दुसरीकडे मंत्रिमंडळातील संभाव्य फेरबदलाची चर्चा जोर धरत आहे. त्यामुळे अनिल पाटील यांना मुंबईत बोलावण्यामागे नेमके काय कारण आहे आणि राष्ट्रवादीच्या बैठकीत कोणते राजकीय निर्णय होतात, हे पाहणे महत्त्वाचे ठरणार आहे.
Discussion about this post