नवी दिल्ली । देशातील आरक्षणाच्या मुद्द्यावरून सुरू असलेल्या चर्चेला आता केंद्रीय मंत्री रामदास आठवले यांच्या एका विधानामुळे नवे वळण मिळाले आहे. “जातिवाद संपला तर आम्ही आरक्षण सोडण्यास तयार आहोत,” असे स्पष्ट वक्तव्य आठवले यांनी केले आहे. मात्र, जोपर्यंत समाजात जातीय भेदभाव आणि जातिवाद कायम आहे, तोपर्यंत आरक्षणाची गरज असल्याचेही त्यांनी ठामपणे सांगितले.
छत्तीसगडची राजधानी रायपूर येथे बोलताना रामदास आठवले यांनी आरक्षणाच्या भवितव्याबाबत आपली भूमिका मांडली. त्यांच्या मते, देशातील आरक्षणाची व्यवस्था ही जातीय विषमता लक्षात घेऊन अस्तित्वात आली आहे. त्यामुळे समाजातून जातिवाद पूर्णपणे संपुष्टात आला, तर आरक्षणाची गरजही उरणार नाही, असे त्यांनी म्हटले.
‘जातिवाद संपला तर आरक्षण सोडू’
आरक्षणाचा आधार जातीय व्यवस्था असल्याचे सांगत आठवले यांनी आपली भूमिका स्पष्ट केली. “जातीय आधारावर आरक्षणाची तरतूद आहे. जर जातिवाद संपला तर आम्ही आरक्षण सोडण्यास तयार आहोत. मात्र, जोपर्यंत जातिवाद संपत नाही, तोपर्यंत आरक्षण लागू राहील,” असे त्यांनी सांगितले.केंद्रीय मंत्रिमंडळातील प्रमुख दलित चेहऱ्यांपैकी एक असलेल्या रामदास आठवले यांच्या या वक्तव्यामुळे आरक्षणाच्या मुद्यावर पुन्हा चर्चा सुरू झाली आहे.
झारखंडमध्येही मांडली होती अशीच भूमिका
विशेष म्हणजे, आठवले यांनी यापूर्वी झारखंडमध्येही जवळपास याच स्वरूपाचे विधान केले होते. रांची येथे बोलताना त्यांनी जातिव्यवस्था संपुष्टात आली तर आरक्षण सोडण्याची तयारी असल्याचे म्हटले होते. त्यामुळे रायपूरमधील त्यांचे ताजे वक्तव्य ही त्यांची सातत्यपूर्ण भूमिका असल्याचे दिसून येत आहे.
दरम्यान, ऑगस्ट महिन्यात राजधानी दिल्लीतील जंतर-मंतर येथे आरक्षण व्यवस्थेविरोधात मोठे आंदोलन झाले होते. या आंदोलनादरम्यान पोलिसांनी ५० हून अधिक आंदोलकांना ताब्यात घेतले होते.आंदोलकांकडून जातीनुसार आरक्षण न देता आर्थिकदृष्ट्या दुर्बल घटकांच्या आधारावर आरक्षण देण्यात यावे, अशी मागणी करण्यात आली होती. सोशल मीडियावरही ‘आरक्षण हटाओ आंदोलन’ या नावाने मोहीम चालवण्यात आली होती.
या पार्श्वभूमीवर रामदास आठवले यांनी केलेले ताजे वक्तव्य महत्त्वाचे मानले जात असून, आरक्षणाच्या मुद्द्यावर पुढील काळात राजकीय आणि सामाजिक पातळीवर चर्चा आणखी तीव्र होण्याची शक्यता आहे.
Discussion about this post