नवी दिल्ली । लोकसभेत महिला आरक्षण विधेयक नामंजूर झाल्यानंतर देशाच्या राजकारणात मोठा भूकंप झाला आहे. या विधेयकाच्या विरोधात शुक्रवारी संसदेच्या आवारात जोरदार निदर्शने करणाऱ्या भाजपच्या महिला खासदारांवर आज शनिवारी पोलिसांनी मोठी कारवाई केली आहे. यामध्ये महाराष्ट्रातील नेत्या आणि केंद्रीय मंत्री रक्षा खडसे तसेच खासदार बन्सुरी स्वराज यांना पोलिसांनी ताब्यात घेतले आहे.
शुक्रवारी लोकसभेत महिला आरक्षण विधेयक बहुमताअभावी फेटाळले गेले. या ऐतिहासिक पराभवानंतर संतापलेल्या भाजपच्या महिला खासदारांनी संसदेच्या आवारातच विरोधकांविरुद्ध रणशिंग फुकले. “विरोधकांनी महिलांचा विश्वासघात केला आहे,” अशा घोषणा देत रक्षा खडसे आणि बन्सुरी स्वराज यांनी आंदोलनाचे नेतृत्व केले. संसदेच्या आवारात निदर्शने करण्यास बंदी असतानाही हे आंदोलन सुरूच राहिल्याने आज पोलिसांनी कारवाईचा बडगा उचलला.
एककीडे विधेयक नामंजूर झाल्याने विरोधक जल्लोष करत असताना, दुसरीकडे भाजपच्या बड्या नेत्यांना ताब्यात घेतल्यामुळे राजकीय वातावरण कमालीचे तापले आहे. या कारवाईचे पडसाद आता देशभर उमटण्याची शक्यता असून भाजप आगामी काळात या मुद्द्यावरून रान पेटवण्याच्या तयारीत आहे.
Discussion about this post