पंजाबमध्ये धावत्या कर्मभूमी एक्स्प्रेसला अचानक भीषण आग लागल्याची धक्कादायक घटना शुक्रवारी दुपारी घडली. पटियालाजवळील सराई बंजारा गावाजवळ ही घटना घडली असून, आगीच्या भक्ष्यस्थानी ट्रेनचे तब्बल चार डबे सापडले. आगीचे लोट आणि धुराचे प्रचंड लोळ पाहून ट्रेनमधील प्रवाशांमध्ये एकच घबराट पसरली. काही प्रवाशांनी जीव वाचवण्यासाठी ट्रेन थांबताच खाली उड्या मारल्या.
मिळालेल्या माहितीनुसार, कर्मभूमी एक्स्प्रेस पंजाबहून बिहारच्या दिशेने जात होती. राजपुराकडे जात असताना सराई बंजारा गावाजवळ ट्रेनला अचानक आग लागली. सुरुवातीला एका भागात लागलेली आग काही वेळातच इतर डब्यांपर्यंत पोहोचली. आगीची तीव्रता वाढत असल्याचे लक्षात येताच ट्रेन थांबवण्यात आली.
ट्रेनमध्ये आग लागल्याचे लक्षात येताच फायर अलार्म वाजला. त्यामुळे प्रवासी सावध झाले. आगीच्या ज्वाळा आणि धुराचे लोट पाहून अनेक प्रवासी घाबरले. ट्रेन थांबल्यानंतर प्रवाशांनी घाईघाईने खाली उतरण्यास सुरुवात केली. काही प्रवाशांनी घाबरून ट्रेनमधून उड्याही मारल्या.या घटनेमुळे काही काळ घटनास्थळी मोठी धावपळ उडाली. मात्र, सुदैवाने या दुर्घटनेत कोणतीही जीवितहानी किंवा प्रवासी जखमी झाल्याची माहिती समोर आलेली नाही.
या आगीत कर्मभूमी एक्स्प्रेसचे चार डबे जळून खाक झाले आहेत. प्राथमिक माहितीनुसार, आग ट्रेनच्या पँट्री परिसरातून सुरू झाल्याचे सांगितले जात आहे. त्यानंतर आगीने इतर डब्यांनाही आपल्या कवेत घेतले. मात्र, आगीचे नेमके कारण अद्याप स्पष्ट झालेले नाही.घटनेची माहिती मिळताच अग्निशमन दलाच्या गाड्या आणि रेल्वेचे अधिकारी घटनास्थळी दाखल झाले. आगीवर नियंत्रण मिळवण्यासाठी युद्धपातळीवर प्रयत्न करण्यात आले. दरम्यान, या घटनेची गंभीर दखल रेल्वे प्रशासनाने घेतली असून उच्चस्तरीय चौकशीचे आदेश देण्यात आले आहेत. आग नेमकी कशामुळे लागली, पँट्रीतून आग कशी पसरली आणि या घटनेमागे कोणते कारण होते, याचा तपास केला जाणार आहे.
Discussion about this post