चोपडा : बुलडाणा येथील भ्रातृमंडळ हॉलमध्ये आयुष इंटरनॅशनल मेडिकल असोसिएशन आणि निसर्गोपचार चिकित्सक असोसिएशन यांच्या संयुक्त विद्यमाने निसर्गोपचार क्षेत्रात उल्लेखनीय कार्य करणाऱ्या कार्यकर्त्यांच्या सन्मान सोहळ्याचे आयोजन करण्यात आले. या सोहळ्यात जळगाव जिल्ह्यातील चोपडा तालुक्यातील पृथ्वीराज सैंदाणे यांना निसर्गोपचार क्षेत्रातील उल्लेखनीय कार्याबद्दल ‘निसर्गोपचार गौरव सन्मान २०२६’ या पुरस्काराने गौरविण्यात आले.
पृथ्वीराज सैंदाणे हे गेल्या १५ वर्षांपासून चोपडा तालुक्यासह खान्देशातील आदिवासी आणि ग्रामीण भागात निसर्गोपचार पद्धतीबाबत जनजागृती व प्रचार-प्रसाराचे कार्य करीत आहेत. ग्रामीण व आदिवासी भागातील नागरिकांमध्ये निसर्गोपचार आणि आरोग्यदायी जीवनशैलीबाबत जागरूकता निर्माण करण्यासाठी त्यांनी सातत्याने कार्य केले आहे.
त्यांच्या या कार्याची दखल आयुष इंटरनॅशनल मेडिकल असोसिएशन आणि आयुष ग्लोबल मेडिकल असोसिएशन यांनी घेवून बुलडाणा जिल्ह्यात आयोजित या सन्मान सोहळ्यात मान्यवरांच्या उपस्थितीत त्यांना पुरस्कार प्रदान करण्यात आला.
या कार्यक्रमास प्रमुख मान्यवर म्हणून आमदार संजय गायकवाड, नगराध्यक्षा सौ. पूनम गायकवाड, डॉ. सचिन सुपे, डॉ. त्रिदिप गुहा, डॉ. प्रशांत कपाले आणि गंगाप्रसाद खरात उपस्थित होते. तसेच व्यासपीठावर AIMA चे उपाध्यक्ष नितीनराजे पाटील, राष्ट्रीय अध्यक्ष बाबुराव कानडे, सौ. दिशा चव्हाण, विजय नवल पाटील, विनोद ढोबळे आणि रावसाहेब घोडेगाव यांच्यासह अनेक मान्यवर उपस्थित होते.
Discussion about this post