उत्तर पश्चिम रेल्वेत अप्रेंटिसच्या 2008 जागांसाठी भरती; 10वी-ITI उमेदवारांना संधी

रेल्वेत नोकरीच्या शोधात असलेल्या तरुणांसाठी महत्त्वाची बातमी आहे. उत्तर पश्चिम रेल्वे विभागात अप्रेंटिस (प्रशिक्षणार्थी) पदांच्या तब्बल 2008 जागांसाठी भरती प्रक्रिया सुरू करण्यात आली आहे. या भरतीसाठी पात्र उमेदवारांकडून ऑनलाइन अर्ज मागविण्यात आले आहेत.

या भरतीसाठी उमेदवार 10वी उत्तीर्ण आणि संबंधित ट्रेडमध्ये ITI केलेला असणे आवश्यक आहे. 10वीमध्ये किमान 50 टक्के गुण असणे गरजेचे आहे.

कोण अर्ज करू शकतात?

उमेदवाराने मान्यताप्राप्त मंडळातून किमान 50 टक्के गुणांसह 10वी परीक्षा उत्तीर्ण केलेली असावी. तसेच इलेक्ट्रिशियन, कारपेंटर, पेंटर, मेसन, पाईप फिटर, फिटर, डिझेल मेकॅनिक, वेल्डर, इलेक्ट्रॉनिक्स मेकॅनिक, कॉम्प्युटर ऑपरेटर अँड प्रोग्रामिंग असिस्टंट, मशीनिस्ट, टर्नर, रेफ्रिजरेशन अँड एअर कंडिशनिंग यांसह संबंधित ट्रेडमध्ये ITI प्रमाणपत्र असणे आवश्यक आहे.

वयोमर्यादा आणि शुल्क

या भरतीसाठी उमेदवाराचे वय 15 ते 24 वर्षांच्या दरम्यान असावे. SC/ST प्रवर्गातील उमेदवारांना वयोमर्यादेत 5 वर्षांची, तर OBC प्रवर्गातील उमेदवारांना 3 वर्षांची सवलत देण्यात येणार आहे.

सर्वसाधारण आणि OBC प्रवर्गातील उमेदवारांसाठी अर्ज शुल्क 100 रुपये आहे. तर SC, ST, दिव्यांग आणि महिला उमेदवारांना अर्ज शुल्कातून सूट देण्यात आली आहे.

अर्जाची अंतिम तारीख

पात्र उमेदवारांना या भरतीसाठी ऑनलाइन पद्धतीने अर्ज करता येणार आहे. ऑनलाइन अर्ज करण्याची अंतिम तारीख 6 नोव्हेंबर 2026 आहे. त्यामुळे इच्छुक उमेदवारांनी अंतिम मुदतीपूर्वी अर्ज करणे आवश्यक आहे.