जळगाव: जळगाव जिल्ह्यात गेल्याच आठवड्यात दोन वेगवेगळ्या अपघातांत ५ जणांचा मृत्यू झाल्याची घटना ताजी असतानाच मुक्ताईनगर तालुक्यातून भीषण अपघाताची घटना समोर आलीय. आज सोमवारी सकाळी ८ वाजेच्या सुमारास आयशर ट्रकच्या धडकेत दुचाकीवरील पती-पत्नीचा जागीच मृत्यू झाला. या अपघातात दैव बलवत्तर म्हणून त्यांचे १ वर्षाचे बाळ सुदैवाने बचावले आहे. गजानन हिरामण पाटील आणि अश्विनी गजानन पाटील (दोन्ही रा. कोचूर, ता. रावेर, जि. जळगाव) अशी मृत पती-पत्नीची नावे आहेत.
मिळालेल्या माहितीनुसार, रावेर तालुक्यातील कोचूर येथील गजानन पाटील हे पत्नी आणि १ वर्षाच्या बाळासह दुचाकीने देवदर्शनासाठी जात होते. सोमवारी सकाळी ८ वाजेच्या सुमारास त्यांची दुचाकी मुक्ताईनगर तालुक्यातील बेलसवाडी फाट्याजवळील मरीमाता माता मंदिराजवळ आली असता, समोरून भरधाव वेगाने येणाऱ्या एका आयशर ट्रकने त्यांच्या दुचाकीला जोरदार धडक दिली.
धडक एवढी भीषण होती की, आयशर ट्रकने दुचाकीला अक्षरशः चिरडले. यामध्ये गंभीर दुखापत झाल्याने गजानन पाटील आणि त्यांची पत्नी अश्विनी पाटील या दोघांचाही जागीच दुर्दैवी अंत झाला. या अपघातात पाटील दांपत्याचा मृत्यू झाला असला, तरी त्यांचे १ वर्षाचे बाळ या अपघातातून थोडक्यात बचावले आहे. या चिमुरड्याच्या डोक्यावरून आई-वडिलांचे छत्र कायमचे हरपल्याने संपूर्ण परिसरात हळहळ व्यक्त केली जात आहे.
अपघाताची माहिती मिळताच मुक्ताईनगर पोलीस ठाण्याच्या पथकाने तात्काळ घटनास्थळी धाव घेतली. पोलिसांनी स्थानिक नागरिकांच्या मदतीने दोन्ही मृतदेह ताब्यात घेऊन उत्तरीय तपासणीसाठी उपजिल्हा रुग्णालयात पाठवले.या प्रकरणी अपघातास कारणीभूत ठरलेल्या आणि धडक देऊन पळून जाणाऱ्या आयशर ट्रकच्या चालकाविरुद्ध मुक्ताईनगर पोलीस ठाण्यात गुन्हा नोंदवण्याचे काम सुरू आहे. या दुर्घटनेमुळे कोचूर गावावर शोककळा पसरली आहे.
Discussion about this post