आमदार रोहित पवारांचा मोठा गौप्यस्फोट; ५ लाख अडव्हान्स देऊन फुटला MPSC चा पेपर!

मुंबई । महाराष्ट्र लोकसेवा आयोगाच्या (MPSC) औषध निरीक्षक पदाचा पेपर फुटल्याचा गंभीर दावा शरद पवार गटाचे राष्ट्रवादीचे आमदार रोहित पवार यांनी केला आहे. आज घेतलेल्या पत्रकार परिषदेत रोहित पवार यांनी पेपरफुटीचे रॅकेट कसे सक्रिय होते, याचे सविस्तर सादरीकरण केले. पेपर सेट करणाऱ्यालाच ‘सेट’ करून हा पेपर फोडण्यात आल्याचा आरोप त्यांनी केला असून, या प्रकारामुळे राज्यभरात एकच खळबळ उडाली आहे.

रोहित पवार यांनी या प्रकरणाचा तपशीलवार खुलासा करत सांगितले की, २२ मार्च २०२६ रोजी झालेल्या औषध निरीक्षक भरती परीक्षेची प्रश्नपत्रिका २० मार्चलाच काही उमेदवारांपर्यंत पोहोचली होती. व्हॉट्सअॅपद्वारे प्रश्न आणि संभाव्य उत्तरे पाठविण्यात आली होती. उमेदवारांना संशय येऊ नये म्हणून “१० प्रश्न मुद्दाम चुकीचे सोडवा”, अशा सूचनाही देण्यात आल्याचा दावा त्यांनी केला.

‘पेपरसाठी १२ लाखांची डील’

रोहित पवार यांच्या म्हणण्यानुसार, एका प्रश्नपत्रिकेसाठी ₹१२ लाखांचा व्यवहार ठरला होता. त्यापैकी ₹५ लाख आगाऊ देण्यात आले होते, तर उर्वरित ₹७ लाख निकालानंतर देण्यात येणार होते, असा दावा त्यांनी केला. या संपूर्ण प्रकरणात बार्शी कनेक्शन असल्याचाही आरोप त्यांनी केला.

भरती प्रक्रियेवर प्रश्नचिन्ह उपस्थित करत रोहित पवार म्हणाले की, परीक्षेचा कट-ऑफ १०५ गुण असताना १०३ गुण मिळालेल्या उमेदवारालाही मुलाखतीसाठी बोलावण्यात आले. हे कशाच्या आधारे झाले? यामागे कोणाचा दबाव होता? असा सवाल त्यांनी उपस्थित केला.

यावेळी त्यांनी आणखी एक धक्कादायक दावा करत सांगितले की, नंदुरबारमधील एका नायब तहसीलदाराच्या मुलाला १४९ गुण मिळून १३ वी रँक, तर मुलीला १४८ गुण मिळून १६ वी रँक मिळाली. दोघांनाही जवळपास समान गुण आणि रँक मिळणे हा निव्वळ योगायोग आहे का? असा प्रश्न उपस्थित करत त्यांनी या निकालाचीही चौकशी करण्याची मागणी केली.

‘पेपर सेट करणाऱ्याचीही चौकशी व्हावी’

रोहित पवार यांनी नीट पेपरफुटीचा संदर्भ देत, “ज्याने पेपर तयार केला, त्याच्याकडूनच तो बाहेर गेला असण्याची शक्यता नाकारता येत नाही. त्यामुळे पेपर सेट करणाऱ्या व्यक्तीची आणि त्यामागील सूत्रधारांची सखोल चौकशी झाली पाहिजे,” अशी मागणी केली. दरम्यान, रोहित पवार यांनी केलेले हे आरोप असून, या आरोपांबाबत एमपीएससी किंवा राज्य सरकारकडून अद्याप अधिकृत प्रतिक्रिया आलेली नाही. त्यामुळे या प्रकरणातील सत्य तपासानंतरच स्पष्ट होणार आहे.