भडगाव । जळगावच्या भडगाव तालुक्यातील वसंतवाडी येथे पत्नीचा चाकूने भोसकून निर्घृण खून केल्याची धक्कादायक घटना रविवारी सकाळी उघडकीस आली. या प्रकरणी पोलिसांनी आरोपी पतीला अटक केली आहे. ललिता आत्माराम रोडे (वय ३६) असे मृत महिलेचे नाव असून आत्माराम पाटील रोडे (वय ४०) याला पोलिसांनी ताब्यात घेतले आहे.
मिळालेल्या माहितीनुसार, आत्माराम रोडे याला दारूचे व्यसन असून तो विक्षिप्तपणे वागत असल्यामुळे पती-पत्नीमध्ये वारंवार वाद होत होते. याच कारणावरून रविवारी सकाळी दोघांमध्ये पुन्हा जोरदार वाद झाला.
वादाचे रूपांतर हाणामारीत झाल्यानंतर संतापाच्या भरात आत्मारामने घरातील चाकूने पत्नी ललिता यांच्या पोटावर सपासप वार केले. गंभीर जखमी झालेल्या ललिता यांना कुटुंबीय आणि ग्रामस्थांनी तातडीने रुग्णालयात दाखल केले. मात्र, उपचार सुरू असताना त्यांचा मृत्यू झाला.
घटनेची माहिती मिळताच पोलिसांनी घटनास्थळी धाव घेऊन पंचनामा केला आणि आरोपी पती आत्माराम रोडे याला अटक केली.
या प्रकरणी संबंधित पोलीस ठाण्यात खुनाचा गुन्हा दाखल करण्यात आला असून पुढील तपास सुरू आहे. पत्नीच्या खुनाच्या या घटनेमुळे वसंतवाडी गावात एकच खळबळ उडाली आहे.
Discussion about this post