जळगाव । जळगाव जिल्ह्याच्या राजकीय वर्तुळातून एक अत्यंत महत्त्वाची आणि मोठी घडामोड समोर आली आहे. भारतीय जनता पक्षातील (BJP) अनेक प्रमुख पदाधिकारी आणि शेकडो कार्यकर्त्यांनी मुंबईत उपमुख्यमंत्री एकनाथ शिंदे यांच्या उपस्थितीत शिवसेना (शिंदे गट) पक्षात जाहीर प्रवेश केला. पाचोऱ्याचे आमदार किशोरआप्पा पाटील यांच्या विशेष पुढाकारातून झालेल्या या पक्षप्रवेशामुळे जळगाव जिल्ह्यातील राजकीय समीकरणांना नवीन कलाटणी मिळाली असून राजकीय वर्तुळात जोरदार चर्चा सुरू झाली आहे.
राज्यातील महायुती सरकारमध्ये शिवसेनेची वाढती ताकद आणि उपमुख्यमंत्री एकनाथ शिंदे यांच्या गतिमान नेतृत्वावर विश्वास व्यक्त करत कार्यकर्त्यांनी हा निर्णय घेतला असल्याचे जाहीर केले. जळगाव जिल्ह्यात शिवसेनेचे संघटन अधिक मजबूत करण्याच्या दृष्टीने हा पक्षप्रवेश अत्यंत महत्त्वपूर्ण मानला जात आहे.
यांनी केला शिवसेनेत प्रवेश?
शिवसेनेत अधिकृतपणे प्रवेश करणाऱ्यांमध्ये जळगाव जिल्ह्यातील प्रमुख कार्यकर्त्यांचा समावेश आहे. त्यामध्ये भुषण भोळे, राहुल पाटील, प्रशांत कोळी, विशाल महाजन, महेश पाटील, मुकेश पाटील, गणेश बच्छाव, प्रशांत चौधरी, राझिक पटेल, ओम बारी, रंजन पाटील, चेतन चौधरी, अक्षय भडांगे, सुयोग गुजर, विकास ठाकरे, जयेश पाटील, सागर पाटील, लोकेश पाटील, भावेश पाटील, दीपक कोळी आणि तौफिक खान यांचा समावेश आहे.
संघटन बळकटीसाठी एकत्रित कामाचे आवाहन
या सोहळ्यात उपमुख्यमंत्री एकनाथ शिंदे यांच्यासह उपस्थित वरिष्ठ नेत्यांनी सर्व नव्या सदस्यांचे भगवा गळाबंद घालून पक्षात स्वागत केले. शिवसेनेची विचारधारा, विकासाभिमुख भूमिका आणि जनसामान्यांच्या प्रश्नांवर थेट काम करण्याची कार्यपद्धती यामुळेच अनेक तरुण आणि अनुभवी कार्यकर्ते शिवसेनेकडे आकर्षित होत असल्याचे यावेळी नमूद करण्यात आले.
पक्षप्रवेशासाठी पुढाकार घेणारे आमदार किशोरआप्पा पाटील यांनी दाखल झालेल्या सर्व पदाधिकारी व कार्यकर्त्यांचे अभिनंदन केले. ते म्हणाले, “जिल्ह्यात पक्षवाढीसाठी आणि संघटन बळकटीसाठी आपण सर्वजण आता एकत्रितपणे काम करू. आगामी काळात जळगाव जिल्ह्यात शिवसेनेची ताकद अधिक वाढविण्यासाठी आणि शासकीय योजना तळागाळातील जनतेपर्यंत पोहोचविण्यासाठी हे सर्व कार्यकर्ते मैलाचा दगड ठरतील.”
राजकीय निरीक्षकांचे लक्ष
महायुतीमध्ये मित्रपक्ष असलेल्या भाजपमधून थेट शिवसेनेत (शिंदे गट) एवढ्या मोठ्या प्रमाणावर कार्यकर्ते जात असल्याने जिल्ह्यातील राजकीय वातावरण चांगलेच तापले आहे. वेगवेगळ्या पक्षांतील कार्यकर्त्यांचे शिवसेनेकडे वाढते आकर्षण आणि आगामी निवडणुकांच्या पार्श्वभूमीवर संघटनात्मक विस्तारासाठी सुरू असलेल्या या हालचालींकडे आता राजकीय निरीक्षकांचे बारीक लक्ष लागले आहे.
Discussion about this post