जळगाव | अमली पदार्थांच्या अवैध व्यापाराविरोधात सुरू असलेल्या मोहिमेत जळगाव पोलिसांना आणखी एक मोठे यश मिळाले आहे. एमआयडीसी पोलीस ठाण्याच्या हद्दीत कारवाई करत पोलिसांनी ६२.०७ ग्रॅम एमडी (मेफेड्रोन) हा घातक अमली पदार्थ जप्त केला आहे. या कारवाईत अमली पदार्थ, मोबाईल फोन आणि दुचाकीसह एकूण ३ लाख ५८ हजार रुपयांचा मुद्देमाल जप्त करण्यात आला असून एका संशयिताला अटक करण्यात आली आहे. तसेच या प्रकरणात मालेगाव येथील एका संशयित पुरवठादाराविरुद्धही गुन्हा दाखल करण्यात आला आहे.
पोलिसांनी दिलेल्या माहितीनुसार, ३१ जुलै २०२६ रोजी रात्री सुमारे १०.४० वाजता एमआयडीसी पोलीस ठाण्याचे पथक वखार महामंडळ (एफसीआय) गोडाऊन परिसरातील सेक्टर ए-१४ समोरील रस्त्यावर गस्त घालत होते. त्यावेळी संशयास्पद हालचाली करणाऱ्या एका व्यक्तीला ताब्यात घेऊन त्याची झडती घेण्यात आली. झडतीदरम्यान त्याच्याकडे विक्रीसाठी ठेवलेला एमडी हा अमली पदार्थ आढळून आला. त्यानंतर पोलिसांनी तातडीने कारवाई करून त्याला अटक केली.
या कारवाईत इम्रान खान हयात खान (वय ३६, मूळ रा. आडगाव, ता. चाळीसगाव, सध्या रा. करीम नगर, फातिमा नगर, एमआयडीसी, जळगाव) याला अटक करण्यात आली आहे. प्राथमिक चौकशीत हा अमली पदार्थ रफीक उर्फ गोल्डन (रा. मालेगाव, जि. नाशिक) याने विक्रीसाठी पुरवल्याची माहिती समोर आली आहे. त्यानुसार पोलिसांनी रफीकविरुद्धही गुन्हा दाखल करून त्याचा शोध सुरू केला आहे.
कारवाईदरम्यान पोलिसांनी ३९.०६ ग्रॅम एमडी, ११ प्लास्टिक पिशव्यांमध्ये ठेवलेले ९.१० ग्रॅम एमडी तसेच १८ प्लास्टिक पिशव्यांमधील १३.९१ ग्रॅम एमडी असा एकूण ६२.०७ ग्रॅम अमली पदार्थ जप्त केला. या ड्रग्जची बाजारपेठेतील किंमत सुमारे २ लाख ८८ हजार रुपये असल्याचे सांगण्यात आले. याशिवाय २० हजार रुपये किमतीचा रिअलमी कंपनीचा मोबाईल फोन आणि ५० हजार रुपये किमतीची हिरो होंडा स्प्लेंडर मोटारसायकल जप्त करण्यात आली. एकूण जप्त मुद्देमालाची किंमत ३ लाख ५८ हजार रुपये इतकी आहे.
या प्रकरणी एमआयडीसी पोलीस ठाण्यात गुन्हा रजिस्टर क्रमांक ६३५/२०२६ नुसार अमली पदार्थ प्रतिबंधक कायदा (NDPS Act, 1985) अंतर्गत कलम ८(क), २२(क), २९ तसेच भारतीय न्याय संहिता (BNS) कलम ३(५) अन्वये गुन्हा दाखल करण्यात आला आहे. स्थानिक गुन्हे शाखेचे सहाय्यक पोलीस फौजदार अतुल रघुनाथ वंजारी यांनी फिर्याद दिली असून, पुढील तपास पोलीस उपनिरीक्षक दीपक जगदाळे करीत आहेत.
Discussion about this post