एकनाथ खडसेंच्या अमृत महोत्सवाला महायुतीचे नेते गैरहजर; गिरीश महाजन म्हणाले,..

जळगाव। राष्ट्रवादी काँग्रेस (शरद पवार गट) पक्षाचे ज्येष्ठ नेते तथा आमदार एकनाथ खडसे यांच्या मुक्ताईनगरातील अमृत महोत्सवी सोहळ्यात महायुतीमधील नेत्यांच्या अनुपस्थितीने जळगावच्या राजकीय वर्तुळात मोठी चर्चा रंगवली आहे. याच कार्यक्रमावर आणि अनुपस्थितीवर प्रतिक्रिया देताना, मंत्री गिरीश महाजन यांनी एकनाथ खडसे यांना आपल्या नेहमीच्या शैलीत एक खोचक टोला हाणला आहे.

काय म्हणाले गिरीश महाजन?

‘एकनाथ खडसे यांना शुभेच्छा देण्याइतका मी मोठा माणूस नाही,’ असे म्हणत गिरीश महाजन यांनी उपरोधिक प्रतिक्रिया दिली. त्यामुळे त्यांच्या या वक्तव्याची राजकीय वर्तुळात चर्चा रंगली आहे. खडसे यांच्या अमृत महोत्सवी सोहळ्यानिमित्त प्रकाशित करण्यात आलेल्या पुस्तकात महाजन यांचा फोटो असल्याच्या मुद्द्यावरही त्यांनी भाष्य केले. पुस्तकात आपला फोटो असल्यास त्यामागे कौटुंबिक संबंध कारणीभूत असतील, असे म्हणत महाजन यांनी त्यावरही मिश्कील टिप्पणी केली.

रक्षा खडसेंच्या वक्तव्यावरही महाजनांचा टोला

अमृत महोत्सवी सोहळ्यानंतर केंद्रीय मंत्री रक्षा खडसे यांनी कार्यक्रमाला उपस्थित राहिलेल्यांचे तसेच उपस्थित न राहिलेल्यांचेही आभार मानले होते. त्यांच्या या वक्तव्यावरही गिरीश महाजन यांनी प्रतिक्रिया दिली. ‘रक्षा खडसे यांचेही आभार,’ असे म्हणत महाजन यांनी पुन्हा उपरोधिक शैलीत भाष्य केले.

एकनाथ खडसे यांच्या वाढदिवसानिमित्त आयोजित सोहळ्यात महाविकास आघाडीतील नेत्यांची लक्षणीय उपस्थिती आणि महायुतीतील प्रमुख नेत्यांची अनुपस्थिती ठळकपणे जाणवली. त्यातच गिरीश महाजन यांच्या खोचक वक्तव्यामुळे खडसे-महाजन यांच्यातील राजकीय संघर्षाला पुन्हा चर्चेचे कारण मिळाले आहे.